同福娃晚飯

Janis過大海工作未夠一年，已經頂唔住澳門沉悶o既生活同埋每星期來來回回o既疲勞，終於決定回歸香港，下星期就返o黎上新工喇!前日專登過去幫佢執o野同搬家檔，佢公司有幾個俾佢稱作"福娃"o既年輕o既同事，聽見auntie駕到，就話要一齊食番餐。本地人帶路梗係好啦，去佢地話平靚正o個間新濠仔記，地點o係比較遠o的o既黑沙環。門口有好多海鮮缸，入到去果然十分客滿，差不多臺臺都點佢地o既招牌"泰式花蛤蟹鍋"，我地5個人仲加"黃金蝦"，半隻"沙薑雞"，"金銀蛋莧菜"，"鐵板玉子豆腐"。個鍋一上就已經眼都大! 一個14吋大鍋，放滿晒蝦，青口，螄蚶，大花蛤等等仲唔止o架，還有一大碟好新鮮o既赤貝同三隻花蟹(Annie Lam實會好開心)!黃金蝦唔太鹹好好味，一碟有十二三隻大中蝦。沙薑雞又係招牌菜，非常軟滑入味。其實個火鍋已經好難食得完，其他幾樣又好夠份量，梗食到捧住個肚啦，又係眼闊肚窄之過。埋單只不過六百零蚊，抵食!