八月飯聚@ 綠楊邨

　 廖太八月飯聚,為Gloria & Jacqueline兩位慶生, 重臨世貿中心的綠楊邨. 訂位時已預訂埋的糯米八寶鴨, 是眾人期待的目標!

102樓的下午茶

被稱為世上目前最高酒店的Ritz-Carlton自開業後，大家都嚮往去上面103樓o既lounge坐坐，居高臨下地嘆嘆下午茶。即使有親人o係度做都無任何優惠，所以一樣要提早預約，終於定o左11號先有位，我同仔女們又來一次難得o既聚會。(BB無份!)訂位時話有dress code：smart casual 但no短褲，no背心，no涼鞋，6個人都四四正正咁出現。點知坐低見到入o黎o的國語同胞咪又係短褲，背心+涼鞋! 邊個敢唔俾佢地入？! o下!

Lobby有專人陪同乘電梯直上到103樓，再經扶手電梯落番一層到tea lounge。嘩，樓底好高，窗外直望港島中上環區一帶海港，天氣良好的話，真係幾悅目。
下午茶menu只得high tea set 一款，而且只有頗多選擇o既tea menu，真係咁傳統無咖啡？分量同味道算唔錯，我地覺得鹹店略少o者。茶不停給refill，可以由三點坐到六點，雖然我地唔係窗邊位，而係面向海景o既近窗梳化，都幾舒服呀。每位價$228，兩位$428。6星級酒店來說，不太過份啦。

生仔都有時價

酒樓餐廳過時過節會加價係平常事，但係入醫院生仔都有時價，真係初次聽聞。話說原定29號先入院o既小新太太今天晨早作動，馬上由東涌飛車到銅鑼灣聖保祿報到，急call醫生準備開刀。雖然最初登記時已經知道晒收費，所以先揀定星期五入院。不過小東西自己擇日出世，要o係復活節假期o黎玩兔仔，咁小新就要俾多$7000喇 ，肉都痛晒!! 好在入院時剛好全院滿座，獲得upgrade到一間每日收費要加多一萬蚊o既兩人"上房"。房內唔係豪華但設備非常先進，甚至每張床前有一台電視/電腦mon+keyboard吊機，只要伸手便可拉至面前，睇電視上網都得，而且已經有晒goole, fb 等等。睇下小新太一回復精神就立即上網就知幾方便。佢地話難得有咁o既享受，點都要用番夠本!

水戶階樂園的梅花

311地震的重災區茨城縣水戶市的階樂園，是日本三大名園之一，亦是著名的賞花景點。園內植有品種數以百計的梅樹三千多株，每年12月下旬開始至翌年3月底陸續開放。相片所見是去年3月24日梅花滿開的景象。

今年3月，已經此情不再。剛上階樂園的網頁，只見寫著園內經過地震及海嘯的無情洗禮，現已門牆崩塌，土地液化，地盤下陷，各種設施更全數摧毀，重開可說是遙遙無期........嘆 !

網頁內仍有不少有關梅花的資料，有興建的話不妨參考參考。

但願災難不再，受害者能堅強渡過。日本加油!!

無敵天災

昨天晚上剛返到香港，想不到今天就發生了日本前所未有的大地震。多謝各位朋友關心問候。

下午一點多，任職新聞台的朋友來電，告知東北及東京大地震時，確有點心寒的感覺，慶幸自己早一天已離開險境的同時，也很擔心當地朋友的安全。電話全打不通，唯有寫e-貓。幾個回覆都幸報平安，但說從未經歷過如斯嚴重的震度，所以感到很恐怖。晚上通訊逐漸恢復，朋友陸續來電回覆說，由於所有鐵路仍未復開，幾乎全部在東京市內上班的人也得在公司過 夜!
看電視新聞，千葉縣油庫的火災...可怕!
小新夫婦和另一對朋友剛去過仙台旅遊，他們也難過得很...
其實我在東京臨走前的凌晨，即10號朝2點半左右，已感到有輕微地震，桌椅和水樽都在搖，幸好只維持了3，4 秒。
1995年神戶大震災，我正身在日本東京，今次也有幸在大地震前離開，家人都說我"死好運"。希望這些好運能分點給我認識及不認識的日本國民，希望他們評平安安。
為所有受影響的災民祝禱......

高山朋友到訪

去年十月的六人北陸團，途經高山市1 古街道時，又凍又落雨。我地衝入一家手打蕎麥麵店食麵之後，跟老闆娘傾談下，知道佢同老闆將會來港遊玩，順口梗係話得閒搵我啦，仲留低卡片俾佢。前兩日，忽然收到一酒店職員來電，話有個客想搵我。hea~~一聽之下，原來真係o黎o左! 山下先生夫婦仲帶埋仔女，媳婦同個一歲o既孫仔，o黎玩3晚4日。不過佢地已經o黎過幾次，搭車在坐船甚至去澳門都無問題，佢地最想係有人帶佢地食o的唔駛靚酒店，但好味o既地道廣東菜o者。第一晚去o左尖沙咀鴻星，o的日本人一見到大大隻o既"瀨尿蝦"已經咀都郁(可憐我最怕o架!)。第二晚銅鑼灣福苑食火鍋，用鮑魚打邊爐都嚇佢地一跳!

山下先生一家好好傾，原來佢地o係高山仲經營一間只有4間房o既小旅館，仲話我地第日再去高山玩的話，一定要住佢o個度，佢會親自下廚o忝。

大雪的名古屋

這幾日東京最低4度，但天朗氣清，還算不差。昨日去名古屋就大件事了! 早一晚，朋友已來電警告，當地反常地不停的落了兩日大雪 (往年只落一日半日)，叫我一定要全套"武裝"才可以。而且因大雪關係，新幹線已經出現延誤問題，分分鐘趕不到二哥的演唱會。。(唔好嚇我呀!)
到車站查問，知道去名古屋無問題，大阪那一段就不成了。沿途天氣還很晴朗，還看到半白的富士山，但一過靜岡縣就一片雪白了。名古屋仍是大風大雪，當晚看完演唱會返東京一程新幹線便出問題。大阪一站因積雪不能開車，所以一直延誤 ，差點以為要住酒店呢! 幸好有一班遲了兩小時的班車於9點半到站又有位，便立即上車。不過一路又停又開的，返抵新宿已過了12點半，比正常足足多了一倍時間!
明天再去大阪，可能又會被困喇!