日本買便當

日本o既大小公司，o係新年過後就開始大減價，所以唔多唔少都出o左o的血。梗係啦，連B仔同JPG有o的都減到半價，真係留耐的都破產！
每年一月頭，京王百貨店都會有”全國車站便當大會”，即係將日本各地鐵路沿線車站內發賣，數百種不同材料製作o既飯盒搬晒去展覽兼出售，例如來自北海道o既蟹肉便當，仙台o既牛舌便當等等。而且不但便當入面o既飯菜各有不同，連便當盒亦好多花款，有膠製的也有瓷器的，做的十分精美。由於東京人口好多都係因工作而從各地移居到來，因此對於呢o的家鄉食物非常懷念，尤其是年長一輩。便當大會會場人山人海，每種便當攤子都排晒長龍。我早一日已經拎住宣傳單張，揀定要買o既目標，返香港之前去到就照單執貨慳時間。我唔會選擇甚麼家鄉口味，只要型狀得意可愛，當然內容也對胃口就行。三個Hello Kitty, 一個全蟹肉加一個全螺片，都係膠便當盒，已經重到死，見到雕晒花鬼咁靚既陶瓷飯盒，唯有睇餐飽，無能力拎返香港喇.
行李過磅從未被罰過錢，今次居然開先河，過o左4kg咁多就罰八千Yen。死死地要俾啦，咁唔通即刻開o急拎番幾kg出o黎咩！
日本人話，新年頭見到富士山就係好意頭。坐機o個日天朗氣清，飛到日本上空，機長就叫乘客留意左手便，嘩...山頂鋪滿雪既富士山，真係好靚！希望今年真係有運行～病少o的啦。
好想睇雪o既我，去左群馬縣既四萬溫泉（地區名，無麻雀打o架）住一晚，雖然唔係大雪，不過總算都還到心願。一路浸露天溫泉一路睇住o的雪飄落o黎，好舒服呀！しあわせ！！

Cool Slideshows