電車男&愛馬仕~真人版

最近o係有關沢田研二o既網頁認識o左一個日本blog友，見佢將二哥一o的歌詞翻譯成英文放o係youtube度，譯得好好，於是同佢溝通溝通，知道原來係個35歲o既男子。講起偶像份外精神，又知道大家都會去TOKYO DOME 睇演唱會，於是一拍即合咁約定早一日o係DOME HOTEL LOBBY 見個面先。其實都幾驚，唔知會係個山口組定係個痴漢。於是拉埋同我一齊去日本o既老友SAM 同BEN 陪住。哈哈，聖誕樹下等緊o既，係個戴眼鏡"咩"住背囊，高版o既電車男!好彩唔係戇居居，而係幾醒目又講得一口流利英文o既正常人!四個二哥迷由兩點傾到五點都未收得，結果電車男話佢女朋友放o左工都想o黎見o下我地。半小時後，一個又瘦(係勁瘦)又高又斯文o既長髮小姐出現，佢一企定就o黎個90度大鞠躬打招呼，跟住..膝頭掂地咁雙手奉上禮物一大袋，好有禮咁話兩樽藍色包裝o既紅酒係俾兩位男士。紅色o個樽就俾我o既。嘩，我地三個眼都突埋，駛唔駛呀! 然後，佢都唔敢坐低o架，等我請佢幾次先至好恭敬咁坐得四四正正，仲笑都唔咁笑! 然後電車男介紹佢女友以前o既工作，係一間好有名o既酒店公關，專門接待外國VIP如英國首相，中東油皇等等，怪唔知咁好禮啦! 望下佢原來拎住個HERMES手袋，佢話係汶來皇子送o架。阿Ben細細聲同我講，個女子好似中谷美紀，呢兩個係咪真人版o既電車男同愛馬仕o黎o架。係喎，個男o既話佢中意簡單生活，中意上網，聽二哥同搖滾樂，而女友就喜歡逛名牌店，聽歌劇。你話係咪真係似到十足丫! 電車男話佢地o既狀況就有如二哥一首叫"BAD TUNING"o既歌，講一對情侶有時要有o的不協調先會增進感情喎!
愛馬仕後來都放鬆o左，仲好好傾添。呀，電車男o係東京郵政總局上班o架。呢兩個新朋友真係幾有趣，日後都會再見佢地。
張相o既最右面兩個就係佢地喇，其餘兩個分別係我的識o左廿幾年o既SAM & BEN。