上野大牌檔

接o左柯打要幫人去上野買咖啡粉，又經過"二木" 街口個專食魚生"丼"[即有料o係飯上面o既大碗飯]o既檔口。記得數年前同姨甥女試過，天婦羅丼隻蝦足足五六吋長，只不過賣500円!如今轉o左賣魚生丼，可能費事開爐炸o野啦，不過仍然其門如市。好，我地三個又食。檔口擺有幾張長檯，可以坐滿三，四十人，大牌檔風味當然係逼逼地啦。檔前掛起大塊menu有圖有字，睇o岩邊樣就埋收銀度講低俾錢，拎住張單搵位坐，一陣間就
飯到。由於等食o既人太多，食完就要識趣o的起身，有茶水供應都唔會慢慢嘆喇。
估唔到咁多年來，價錢都無乜變動，三文+金槍魚丼500円，我o既帶子+金槍魚丼600円，全店最貴o既海膽+海鮮丼都係1000円o者，所以成日都有條龍排緊。呢度當然唔會期望係高級貨，不過都係新鮮嘛。o係香港已經好少幫趁大牌檔，反而去外地仲有機會喎。