沙漠之旅

十二日假期轉眼又告終結，時間好似過得越o黎越快喎。
沙漠之旅成員：我，家姐，佢個仔& 女，即我姨甥，佢新抱+3隻好可愛o既小魔怪(2男1女，7，4 &2歲)共8人，一架8人車。

最初o既十日，完全o係澳州中部o既沙漠渡過，最後兩日先返墨爾本。行程由Alice Spring開始，呢個小鎮係前往大舊石"Ayers Rock"o既轉接站。家姐與姨甥一家早兩日已先抵步，入住渡假屋等我同姨甥女阿C。o係A.S.嘆o左兩日陽光(38度)+游泳+spa，第三日正式進入沙漠。遠途先經Kings Canyon(類似美國o既大峽谷),住兩晚。姨甥們一早5 點出發上谷頂睇日出，我同家姐當然免役啦，因為要摸黑行崎嶇山路嘛。等佢地行完3個半鐘後，返o黎再同我地繞住山腳行個半鐘比較平o既輕量級步行徑。之後幾日o既程序都係一樣，而且由酒店到每個景點，都要半小時以上車程，所以姨甥們係最辛苦喇。

Ayers Rock被稱世上最大o既單一塊石頭，所以冒名而來o既遊客亦較多，大石外圍有一超大型渡假村，裡面分別有2至5星級酒店，豐儉由人。我地租住4星o既apartment，設備相當齊全。所見o既除了本地人外，仲有好多歐洲遊客，日本有幾團代表，甚至廣東話都時常聽到o架。

大舊石距離地面348米，周圍9.4公里，遠望唔覺佢好大，但係坐車經過就知道佢o既size，行到埋去更覺得自己好渺小。沿住base walk 行約一小時，石璧內有好多以前原住民留下o既璧畫，亦有怪石嶙峋，幾有趣o架。對原住民來說，呢舊石係佢地o既聖地，因此途中好多段都定明唔准影相。一到中午，又晒又熱，唔適宜再繼續在外，我地打道返酒店午飯，然後跟小魔怪們午睡。講開呢個小朋友都算乖，跟住大人日日行山路，連兩歲o個個都無扭計，真抵錫。

附近還有另一組巨石Olgas，比大舊石稍高，我地亦以同樣程序行過，發覺碎石塊更多，也行得最辛苦。好在雖然成三十幾度，但濕度只得三十幾，所以唔會熱到周身濕立立，最緊要齊三寶~黑超，帽 + 烏蠅罩就得喇。

呢度沙漠跟其他o既沙漠只最唔同o既，係o的沙全部紅色。我一時大意帶o左對米色鞋，而家變o左唔知乜o野色喇。

沙漠之後，開始啟程南下回墨爾本，途經Coober Pedy Opal 礦石場參觀，並o係小鎮入住一家地下礦洞酒店。房間話係地底，但我覺得好似basement而已。

接近南澳有一盛產葡萄酒o既小鎮Barossa Valley，全區都係葡萄園同酒莊，原本打算去試酒買酒後住宿一晚，可惜忘記當日正值Good Friday，全人類休息，節目取消。幸好找到一家照常營業o既意大利餐廳，否則無飯開喇。呢區出產o既紅酒，據說連續3年嬴過法國產品，所以名聲大噪。我地o係餐聽飲過兩隻，真係好味又夠平。

返抵墨爾本，仍然是復活節假期，政府規定所有大小商場都休息，甚至賭場都唔准開，所以我無得shopping，
手信都係去到機場先買到咋。

影o左千幾張相，仲未整理好，睇住幾張先喇。