水蜜桃做早餐

侄女雯雯已經十多年無去過日本，今次為慶祝大學畢業+21歲生日，話要去買靚衫喎，所以都要同佢去o的最熱門o既購物集中地。雖然自己去過無數次，不過正值夏季大減價，我o地日日行到傷殘咁滯!加上雯雯都係中意食o野之人，都可謂志同道合!
日本o既夏季特別多姿多彩，各大百貨公司推出夏日o既棉質浴衣(輕便和服)，圖案色彩靚到唔識形容。食品部又有各式五顏六色o既清涼甜品，刨冰，仲有剛好合時o既水蜜桃..櫻桃..巨峰提子..青提..平靚正，我o地每朝一個桃做早餐，而家諗起都流口水!
日本有o的節令都同中國一樣，只係佢o地行新曆。好似7月7號(唔係七月初七)，佢o地亦有七姐誕o架。我o地check in o個日，酒店職員俾o左張彩紙我o地，叫我o地寫o的願望然後綁o係門外o既竹樹上面。有o的地區仲有節日燈會之類，好熱鬧o架。