探病+午飯

又係一個唔注意自己身體o既故事：朋友個女winnie係酒店o既高級職員，每月都要飛海外三四次開會。佢成日話自己好健康，所以從未去做女人必須要o既檢驗。上星期佢患腹瀉，一日之內屙o左十幾次，醫生話佢染到諾沃克病毒。順手同佢上下做婦檢。一摸之下，發覺腹下有硬塊，立即再做超聲波等等，然後證實卵巢內有一9cm的腫瘤，子宮亦有3粒小瘤，雖然似乎屬於良性，但建議佢立即做切除手術。仲話佢個瘤咁大，加上完全無病徵，如果佢再坐多一次長途機，就隨時有爆裂o既可能，到時真係大茶煲喇。佢昨日入o左養和，手術順利，不過就割o左一邊卵巢同輸卵管喇。佢已經over四十，未婚，但都唔會預算生仔囉。今次真係好在腹瀉咋，否則...你話女人係咪要好小心呢...!
今日去探完winnie，就同朋友去跑馬地好出名(人地話o既)o既譽滿坊食晏。呢間o野鋪位好細，食中菜，聞說o的點心幾有特式，原來價錢都相當唔簡單。蝦餃燒賣之類每籠兩粒$30，總之乜都係的的式式。朋友想食生炒糯米飯，兩人份量竟然賣一百三十大蚊! 我就覺得呢度有o的名過其實，除o左話即叫即製做賣點，同燒賣有幾條真魚翅o係上面之外，蝦餃皮又厚又韌，荵油餅好鹹，糯米飯普通過普通，為何咁貴有點費解! 可能o係旅遊書有介紹o掛，見到店內有韓國妹，洋人&東南亞人等遊客，本地人只得一兩台咋，哈，哈 !