第一餐團年飯

老公公司o既團年飯，一向都係由班妹仔話事，(因為只得兩個男丁)佢o地中意去酒店食buffet多過食鮑參翅肚，咁多年來差不多間間都食勻，今年終於輪到半島喇。梗係唔會上FELIX啦，一樓o既露台餐廳o者。最初想訂下月初，但回覆話由下星期開始已經無廿幾個位俾到我o地，所以無乜過年氣氛都唯有照去啦。
原來唔係全buffet，而係頭盤食salad bar，然後有湯，主菜，甜品+飲品。salad bar本身已十分豐富，各類蔬菜之外，還有魚生，壽司，生蠔(好靚o既愛爾蘭石蠔)，大蝦，凍肉，仲有生果，雪糕&好多甜品。食完o的冷盤其實已經好飽，好彩我揀o左牛肉清湯無咁"溜"。主菜有4個選擇：牛柳，鴨胸，銀鱈魚(加拿大的)&焗三文魚。我要o左鴨胸，伴橙，洋梨+南瓜，好味呀!有個人食o左廿幾隻生蠔，真係乜都抵晒! 跟set上o既甜品係士多啤利梳芙喱，幾香。不過出面o的甜品仲正，細細件好精緻，有o的仲有金箔呀! 跟咖啡上仲有好多款曲奇，食剩o左仲俾個好鬼靚o既袋仔我o地拎走。
向來對半島都幾有好感，中意入面仲保留住o既懷舊氣氛，厚厚o既地毯，仍然好週到o既服務態度，難怪依然係世界第一位。
今晚o既buffet每位$398+10%，咁o既質量o黎講係好值。臨走前，各位妹仔已經鎖定明年o既目標係四季酒店喇。

Cool Slideshows