內服SKII ？

早幾日又去嘉亨灣探探朋友兩隻小貓咪霜霜&LUCY。唔見兩個月，兩隻已經大o左一倍有多，唔再係BB喇。霜霜仍然好活潑四圍跑，但LUCY已經識得怕羞，呢o係房度唔肯出o黎見人。玩完貓貓，例牌又一齊食晏，朋友話發現附近有間細細菜館，主打無味精o既住家菜。呢間叫"中意彷"o既小店，中午時間有套餐，一湯一菜，白飯&油菜+精緻甜品，四十零蚊，小菜選擇也甚多。我o地三個人叫三個餐，揀o左花生炆豬手，咖哩薯仔炆雞 同雲耳甜豆雜菜，整得幾好味兼真係無味精。飯後甜品似乎係該店o既人氣項目，侍應姐姐拎住一盤裝住十幾款的式甜品埋o黎，好似唱歌咁逐樣介紹，真係樣樣都想試，不過只可選其一。想食多款都得，加多$8啦。所以我 地又要o左姐姐特別推薦o既"想靚必食~內服SKII"，佢話其實係杏汁+白果付竹+海底椰，有美顏功效喎。係真唔係都好，幾好食就得啦。

間鋪位於嘉亨灣對面o既公園仔旁邊，面積同SOGO B2餐廳查不多，似乎係家庭式經營，所以侍應們都有禮熱情。店內有個大酒櫃，佢地夜晚做埋串燒，好似中式居酒屋咁，遲o的再去試試先。