貓狗聯婚

一向對於有貓貓圖案o既事物都特感興趣。日前連xxpre-sale，諗住只係睇o下，點知去到鞋部，一眼就望到隻有貓頭o既黑白色拖鞋，立時雙眼放光，即刻叫哥哥仔拎埋另一隻試試。哈..原來另一隻係狗頭，好趣緻呀，仲有名你叫：Cats marry dogs! 咁得意o既o野，而家o係屋企lu...

小休

12日長旅程後，隨著o既3日台北，可算係一個小休。尤其是我朋友只想去行行逛逛，完全唔駛寫定行程，十分輕鬆。呢個朋友有糖尿病，但勁中意食o野又唔介口，o個日上午見完醫生覆診，下晝就上機。去到係咁食，仲要猛攻甜品，佢話覆診完要放肆一下，真係戥佢驚咯!
太平洋崇光居然o係斜對面開多間，可以經地道相通，好方便。新店地下就有間幾大o既鼎泰豐，當然要幫趁啦。一樣要排長龍，都係等十五分鐘o者。不過發覺蟹粉小籠包以前10隻賣NT$195，而家一籠只得6隻NT$185，咁咪貴o左好多!幾個月無去，唔知其他分店有無加價呢？
阿四中意飲o既玫瑰茶幾時出o左紙盒裝？
捷運出o左新o既車票，係一個類似籌碼o既物體，向住個機"du"o下入閘，出閘就插入閘口收番。
例牌都要去光華，執o左幾套舊日劇同SMAPo既節目。