這個聖誕...

今年聖誕，覺得銅鑼灣好似少o左人，屋企周圍日間仲多人過夜晚，即使countdown時亦無以往咁嘈，唔通真係過晒去尖東？
24號下晝四點幾去明珠買飛睇占士邦，估唔到聖誕前夕午夜場都會唔滿座! 我同老公都係007迷，所有小說&電影都睇晒。o係我o地心目中，辛康納利已經係007化身。換o左人做之後真係一蟹不如一蟹，無乜邊個睇得上眼，好難得咁Pierce Brosnan o岩o岩覺得順眼o的，又換一個似壞人多過特務o既Daniel Craig! 雖然佢個樣唔掂兼無台型，不過一味打得，聽講演出反應唔差，日後仲有排做o忝。成套Casino Royale無高科技武器，只得手槍，手機，電腦+拳頭。劇情幾緊湊，可以話無乜冷場，係近期o既好戲之一。過兩日仲要睇埋好耐無見o既金城武o既"傷城"，應該都唔差o掛。
前兩日開始一直入唔到個blog，今晚糧尾返o黎電幫我搞番好。乜而家有新版咩，係咪一定要轉呢？

終於......

由日本帶埋o的感冒返o黎，一直病足兩個星期，睇o左三次醫生，到o左今晚差不多食晒o的藥，耳仔先開始通番，食o野有番o的味覺，成個人都無咁"渾噩"，希望俾我過番個開心聖誕啦! 病一病居然唔見o左兩個半kg，好定唔好呢？
o係機場懵懵o地唔見o左手機，雖然有保險賠償，但係唔見o左好多朋友o既聯絡，好多今次影o既相&二哥o既珍貴video，肉都赤埋!買番部SE800i，不過一路都無精神研究o的功能，都係等假期先搞。

伊香保溫泉

o係日本o個幾日，雖然只得6~10度，不過天氣非常晴朗，每日都見都藍藍o既天空，真係心情都特別靚。可惜成日出入冷空氣同室內暖氣之間，終於又中招惹了傷風。返到香港都未過海關，因為頭昏腦脹之故，o係洗手間裡面連電話都唔見埋，真大懵!結果都要睇o左兩次醫生，先有番o的"起色"，有心機搞搞o的旅行相。
今次o既主要行程之一，係去伊香保溫泉。由新宿坐高速巴士要坐兩個半鐘，住宿o既旅館要成萬八日元一晚包早晚兩餐，算係中上價，晚餐食o既係懷石料理，有十幾度菜，唔好以為一粒二粒，結果都係食到眼突突收場!室內同露天溫泉都夠大，幾舒服。伊香保o既著名景點，係一條有360級o既石段街，行晒都幾扯氣o架。我同朋友仲戇居，信錯地圖指示，話石級盡頭再行多20分鐘就可以到達山頂吊車站，諗住去到再坐吊車落山。點知指示無話o個條路係斜路+石級上山，仲係好鬼直o個隻! 我地兩條"茂利"足足用o左40分鐘有多，行o下停o下咁先上到去，好彩無碌落山。望見車站o個陣，幾乎虛脫咁滯!個車站職員仲話"乜你地咁勇，人人都係坐吊車上o黎然後行落山o架"，真係無氣答佢! 坐吊車落山只不過4分鐘咋，陰公!!
有興趣睇相的話，請去：
http://xina925.spaces.live.com/

一番到就出事

去ｏ左日本成個星期，終於帶埋ｏ的傷風返ｏ黎。落ｏ左機十分鐘對耳仲未聽到ｏ野，頭暈兼腦脹。未出海關前先去洗手間，點知放低個電話就唔得拎，再入去已經無ｏ左喇！唔好怪人貪心，只怪自己大意吧。即刻叫糧尾同我打去３截sim卡，話要十五分鐘先截到，希望唔會俾人打IDD上月球啦。算喇，都用ｏ左幾年，跌都跌到花晒，而且買ｏ左保險有得賠，聽日買過部新ｏ既當聖誕禮物啦！
希望各位親朋好友唔會收到ｏ的古怪電話就好ｏ勒。