由澳洲返來幾日一直調整緊生理時鐘，並非有jet lag　而係o係o個邊竟然入鄉隨俗習慣o左早眠早起o既"唔正常"生活。[十一二點就上床~因為無夜市，又無得上網(；_；)，晨早七八點起身~因為要爭取時間出發遊玩，兼且有3隻小鬼大鬧鐘(>_<)]。返到o黎點都要做番"正常"人，唔俾自己到時到候烏眉瞌睡至得。
到達當晚氣溫5度，凍得要命！
今次行程全部由住o係o個邊既姨甥安排妥當，作為慶祝佢阿媽我家姐既生日禮物。我地姊妹兩人先去悉尼玩三日，因為我未去過。等姨甥女阿Ｃ遲數日由香港抵步後，再同佢地全家人（家姐夫婦，姨甥夫婦＋3小孩，阿Ｃ）一行9眾飛去BRISBANE，租部大車自由行，沿住黃金海岸遊玩5天。
內陸機張登機証好趣緻，同超市o既收據一模一樣，一個唔小心就會當垃圾掉o左，我家姐就係喇。
今年世界各地天氣異常，澳洲亦然。目前雖是冬季，不過比往年凍得早，氣溫亦較以往更低，朝早見到汽車既窗有結霜o忝。黃金海岸一帶較暖，本應有廿多度，但連日來也低至6,7度，帶去o既短褲短袖Ｔ幾乎唔駛著！
悉尼海港好靚，大橋好宏偉，同阿Ｃ約定下次一齊行上橋頂。（其實好高o架，我諗到時會腳軟）
o係SURFERS PARADISE，第一次見到真正既滑浪。澳洲既沙灘勁乾淨，沙又幼滑，雖然只得幾度，但係都有同埋o的細路行到落海邊玩水。NOOSA海灘睇日落又係一大節目，好靚！沿途經過一的小鎮，環境幽雅，有好多別緻既店舖售買特色既手工藝品。
由於太冷，今次去唔到PHILLIPE ISLAND 睇企鵝。來回五小時車程外，還要坐係海邊幾個鐘，我諗凍死o左自己o的鵝仔都未上岸喇。不過參觀動物園同水族館時都見到可愛既小企鵝，雖然只有幾隻。仲見到罕有既白孔雀，白袋鼠，兼可以近距離同樹熊合照o忝!
食蠔係重要節目之一，生既，芝士焗，薑荵焗，豉椒焗..平靚正。白灼鮑魚..唔算平，但好好味。食左好多餐意大利菜，木炭火焗o既pizza係特別香口o架。仲有越南區既牛肉粉，意大利區既咖啡+cream cake，雪糕。十幾日來係咁食..食..食...
五年前，o係墨爾本街頭聽到廣東話多到好似身在香港咁，今時今日已經轉o左頻道喇~一街都係同胞。我地o係悉尼參加既Local tour，差不多係大陸人，導遊都只係講普通話。不過o係黃金海岸一帶o既旅遊區，竟然係中東遊客既天下，成街都係黑長袍女人同白衫白褲男人。聽當地人講，呢的中東人好有錢，每年夏季就拖男帶女o黎避暑，租最靚o既度假屋住足個月o架。
o係香港咁擠迫既環境（尤其是銅鑼灣）居住，一下子去到地大人少o既外地, 真係覺得呼吸既空氣特別新鮮，夜晚望上天空o既星星都份外明亮o架。姨甥叫我同佢合股係Noosa灘邊買個單位，可以時常去度假喎。哈..咁我咪要學埋滑浪？！
影o左大概有一千張相，仍在整理中，過一兩日應該可以俾人睇喇。

小別兩週

上一次去澳洲，不覺已經係5年前o既事。今次再去，主要係同我移o左民o既家姐慶祝生日。之後，佢兩個仔女亦會放大假，全家總動員咁同埋我一齊去黃金海岸玩幾日，加上我會先去悉尼3日，所以由9號到22號，去足兩星期。(屋企3隻人貓扁晒咀!哈哈)澳洲現時係冬季，6度~13度，o係我地三十幾度熱到暈o既天氣下，拎住件羽絨上機真係有o的想死。不過家姐日日電話到，提醒要帶夠衫喎。那邊廂，姪仔話去黃金海岸要帶泳衣，短褲..咁即係乜都要啦，所以執行李執到一頭煙!
好期望再去PHILLIP ISLAND睇企鵝仔，但係天氣咁凍，坐o係海邊等個幾鐘會結冰o架，都係去到睇睇情況先。
講起5年前去過澳洲，咁即係我識o左廖太們已經剛好5年喇。因為02年5月JERRY寫真集簽名會後個零月，我地就o係某卡拉OK初次會面。佢本寫真集亦係o係墨爾本取景，比我早去幾星期咋。時間過得真係快....!!