曼谷

返o黎幾都未寫遊記係因為太熱，熱到唔想記住o的咁熱o既地方。
今次同阿靜兩個，無男人同行真係舒服晒，行公司shopping唔使晒住要人等。受過上次俾的士佬搵笨o既慘痛教訓，今次除o左由機場出酒店之外，全程都係酒店~空鐵~商場~空鐵~酒店~~~街都無行過呀!不過對於行公司狂o既阿靜o黎講，已經係好充足o既節目喇!行行食食，咁又放o左幾日假~~
泰國真係得個熱字，不過樣樣平。我o地o係酒店入面間韓國餐廳食o左兩餐，一餐係自助燒烤，o的材料新鮮乾淨過好多香港菜館，食到眼突突每人都唔駛百二蚊。
我o地發覺有不少店舖都有人妖店員存在。一晚，o係Boots睇緊o的腳部磨砂膏時，忽然一把半陰不陽o既聲音o係身邊介紹邊隻好用，回頭一望~嘩!長捲髮+化濃粧+對釘珠人字高跟拖，個樣唔差o架，但係上下唇都有鬚呢!我o地未試過咁近距離見過呢類，所以係有o的震撼。
呢幾張相分別係韓式燒烤，韓國餐廳，酒店lobby，蟹肉炒面，荔枝/西瓜沙冰。

天芍壽司

好耐無o係香港食壽司0喇，今晚上完堂就同日文老師去間正宗o既日本料理"天芍"慢慢坐慢慢食。呢度價錢唔平，但用料極新鮮。師傅介紹一隻今日剛到貨來自北海道o既"石垣貝"，以前都未見過。拎到埋o黎仲郁郁o下，老師話有o的殘忍，不過好美味喎!仲有平目，鰹魚，uni都好新鮮。每人食o左十件左右，飲埋碗紅麵豉湯，師傅又送隻栗子雪糕..勁好味!飽晒!
以前個肥佬壽司師傅個樣好鬼惡，成日鬧伙計，又唔同人傾計，係人都怕o左佢。而家換o左個o黎o左香港8個月o既小肥佬，中意同人傾計又會介紹有乜好食，咁先似食壽司o架嘛!

迪士尼酒店幾個價

決定下月會去東京迪士尼sea玩，又入住間official 酒店一晚，咁咪拿拿臨訂房囉。五月尾o既價係雙人房￥26000即係一千八百蚊左右，無早餐。係貴o的，不過諗住同姪女去玩，訂o左算喇。估唔到，今日得閒上酒店網check o下o的設施，居然見到有o的新推出o既plan，同等o既房而家只係￥17600，一千二百幾咋，仲包埋早餐o忝!嘩，梗係唔會蝕底啦，即刻取消上次訂單重新訂過，咁又慳番八千幾YEN，可以食得好多碟蟹腳壽司喇!當然我訂o個隻係最普通o既房啦，但睇間酒店由7月至9月尾都係做特價plan，難道生意唔多好？

法國私房菜

我今日問o左老闆娘Piann喇，佢話3號已經有人包o左場開party，咁即係4號有位，各位意下如何？
至於menu，佢話仲有咁耐時間，不如等到月尾，睇o下到時有乜o野合時先至寫。但我講o左有人想食warm chocolate cake，又有人想食龍蝦雪糕，問佢做得邊隻。大廚Andy話，咁整個雙拼咪可以兩樣都試晒囉。hehe~~咁梗真係正晒啦!!

昨晚約o左兩個老友食飯，試新o野"紅樓"，即時代廣場對面魚一丁3樓。賣o既係小南國同類型，我o地點o左蜜汁火方，小黃魚，兩個冷盤，一個全家福(即雜錦砂鍋)加個高力豆沙。我就覺得好平凡，都係小南國整得好食o的，埋單五百幾，唔算太貴，不過招呼麻麻地o者，可能唔係熟手侍應，我諗有排都唔會再去住lu。
差不多食完，阿女電話來話佢同個同事o係法國私房菜度食飯，佢話老闆娘剛剛養o左隻好可愛o既Toy Poodle狗仔，帶o左出o黎玩，問我要唔要睇。o係同一條街之嘛，一於幾個人操晒上去玩狗狗兼飲咖啡。小狗叫"波士"，4個月大，啡色孿毛，得8~9吋長咋，真係好得意呀!(而家阿女就猛咁慫恿我讓番隻)老闆娘話會日日帶佢出o黎，下次上去食飯，又可以有得玩喇。

得意o既麻雀牌

唔舒服o左幾日，又係感冒+氣管炎作怪，今日大昏迷o左成日，訓到傍晚先起身，總算似乎好o左o的啦。
糧尾搬o左去映灣園半年，我o地家人都未有一齊去探過佢，等o黎等去，終於昨日約埋去打擾佢新居。我新抱Amy係忠實Kitty 迷，家中擺設都係大細Kitty不在話下，最有趣o既係佢剛買o既Kitty麻雀，話要等我o地開齋。拿拿臨拎出o黎，哇...真係好趣緻喎! 粉紅色o既牌，筒索萬子用數字，貓頭，熊仔頭代替，3隻動物做中發白，仲有一張Kitty頭像o既抬墊，可惜無o的骰仔配埋一套。不過，o的貓頭熊頭一粒粒，玩得一陣已經眼都花晒!!

又搵到人陪

7月o既日本行，本來預o左係個人遊。前日同幾個兄弟食飯，細佬個女剛由英國返o黎，佢原來已經大學畢業，而家等7月中返去行畢業禮。佢又話想去旅行，真係o岩晒啦。hehe~~我又做o左魔鬼引到佢，o靚妹仔點會抗拒去日本丫？我細佬佢老豆叫我唔好帶壞佢個女喎..睇o下點! 正話先上網訂o左迪士尼其中一間official hotel，差不多$1800一晚，o靚妹話要豪返o下，激死!今次肯定又要去原宿，下北澤，吉祥寺囉!