又見波士

"大頭蝦"龜島原本上個月尾o黎，誰知o係出發o個朝先至搵唔到本護照，懷疑當垃圾掉o左。結果要cancel機票兼重新申請護照，昨日終於o黎到見老婆同個仔喇。呢位仁兄係我日文老師個另一半，居於沖繩島，因工作關係，長年同老婆分隔兩地。
今晚約o左佢地一家人去Legend Concept，食佢地好恨食o既法國料理。因為通常呢一類o既餐廳，係唔歡迎3，4歲以下小朋友o既，小龜仔只得兩歲幾，所以佢地都好耐無嘆過喇。知道o左LC係私房菜，細路仔都可以去之後，一直都話恨到牙旭旭。
而我呢，就好想見o下波士囉!嘩，簡直唔認得喇!七個月o既波士已經好大隻，留長o左毛毛又剪o左新髮型，仍然一樣咁可愛!小龜仔第一次同狗狗咁近距離接觸，都不知幾開心，兩隻o野轉o黎轉去玩到喪晒，小龜仲幾乎想入埋狗籠同佢訓o忝!
今晚頭盤係焗野菌撻，二道係黑豬面肉，主菜係油鴨腿or煎多寶魚。難得大廚知道客人係日本人，佢用o既汁料都加o左日式風味，好正。又係顧住傾計，一直到甜品先記得影相! 雲呢拿雪糕+apple crumb，凍+熱組合，好好味呢!!
*今晚又po唔到相! 請到：http://xina925.spaces.live.com/ 睇啦。

仍然仔仔

狂煲完"深情密碼"翌日，早前訂購o個套仔仔o係日本推出o既雙DVD特輯亦寄到，真係o黎得太合時呀!
呢套DVD係特別為日本市場拍製，內容全部係仔仔o既台下生活。有日本公司策畫，果然跟我o地以前睇o既F4特輯感覺唔同，JERRY較早前o既日本會見面係咁，仔仔呢套亦然。o係第一隻碟o既訪問中，從來未聽過阿仔講咁多o野，亦第一次聽到佢話中意拍戲多過唱歌，又知道佢最近受好朋友影嚮，由唔中意食甜o野到而家餐餐都要搵飯後甜品。第二隻碟係阿仔自己楂車帶大家去佢鄉下宜蘭，一路介紹沿途風景。又去到佢o既中學校，搵番間班房同佢坐過o既位，仲有一個好錫佢o既老師，講o左好多當年o既趣事。最後一part係阿仔落廚煮咖哩，由切料到完成都係佢一個人做晒，好認真o架。還有F4香港演唱會時，佢綵排舞蹈o既片段，拍"深情"o既籃球場面等。
雖說內容係經過刻意安排，不過有好多都係幾真o架。例如佢晨早四點幾楂車去宜蘭海邊睇日出o個段，就可以見到阿仔對家鄉o既感情喇。

深情蜜碼大作戰

老公去o左加拿大，今個中秋得我自己過。好彩有套仔仔o既"深情蜜碼"，令個假期非常充實，係咁o係張梳化度坐足兩日。剛剛凌晨3點10分睇完28集大結局，眼紅紅咁收工，終於有覺好訓!可能好耐無睇呢類劇，又好耐無見阿仔，加上o岩o岩睇完套悶蛋"白塔" 所以一開始就不可收拾。故事唔錯，青島景靚之外，阿仔演戲大有進步，女主角亦幾好戲。唯是結尾略覺有韓劇影子，死都要靚過人!! 不過，都算係近期較值得追o既一套喇。

魚魚車

前幾日行入時代廣場，做緊一個好特別o既車展。聽講係一個好中意金魚o既藝術家，將金魚溶入小跑車設計中。另外，仲有一架白骨車同埋車蛋蛋，真係幾可愛呀。唔知我隻貓王見到o的魚車，會唔會爭住跳上去呢？!

朝聖

忙o左幾日，今日終於得閒一早落去"仙樂"朝聖。佢地個個都話阿仔套"深情密碼"好掂，入門第一樣梗係執一套先啦。跟住個阿姐即刻撲埋o黎，話呢套韓劇要必買，o個套又係必睇，係咁質過o黎。嘩，我上次買o個o的都未睇晒! 係咁意要o左6套急急走人，佢仲未肯收聲呀! o個度而家大清貨，有o的比較舊o既韓劇台劇，只係賣十蚊一套咋。
可以晚晚阿仔"送"飯lu....