生日＝雪糕日

25號一早，何小姐就催住去食早餐，話要西式o既，即是火腿蛋o個類。原來佢真夠傳統，話我生日一定要食蛋。哎..已經幾十歲仲要有"王"管咩!
今日行程係整日shopping..先去上野"二木"買食o既，拎住大包小包手都軟，午餐就o係附近間松板屋上面o既飯堂解決。中華海鮮炒面好脆脆，味道都唔錯。
返酒店放低o的包包，繼續向TOKYU HANDS 同高島屋進發。長假關係，百貨公司都做特價週，所以四圍人山人海，尤其多細路。行到四點幾，何小姐提議去TAKANO食生果下午茶，歇歇腳都好。我地分別點o左季節推介o既黃金桃&提子parfait，好睇又好味!
買埋蝦餅手信，已經五點多。由於訂o左o係酒店食shabu shabu, 所以應該返去執下個樣先。誰知行過ＨＤ雪糕店，馬上記得佢地逢係5,15及25號都做特價，650Yen就有5球，味道仲係任揀無限制, 確實抵食。有糖尿病O既何小姐第一個衝入去拎起張ORDER紙填選擇，我問係咪兩人食5球，佢話：我從未遇到做特價喎，又係你生日，要食番夠本，一於每人５球！o下...已經六點喇....!
第一次試京王o既火鍋店，外面有花園圍住，環境很不錯呢，不過客人不多。七點半開餐，先點一份前澤牛及一份鹿兒島牛＋黑毛豬SHABU SHABU套餐.有兩款刺身及前菜之外，肉O既份量亦算夠稱。大家仲想試埋黑毛和牛，所以追加一份。同先前兩種一樣都係入口即溶，跟米澤牛有得比！倒是黑毛豬肉質較”鞋”，有點失望。單尾還有烏冬，蕎麥麵或中華麵可選，但食唔落喇。甜品到．．密瓜＋又係雪糕！呢餐唔駛三萬YEN,酒店O黎鋼唔算貴，多謝何小姐請客。
我地兩人今日太放肆喇，三個幾鐘之內食O左七球雪糕，真係超晒標！
返O黎都唔敢講俾何小姐個女知呀。

新鮮送到的Minho

郵差叔叔剛送到, 新寵Minho日本出版o既寫真集.
手印據講係佢自己o既, o的日文都係佢寫o既. 由上至下依次為: 旅程, 青春(左), 夢想(右), 自由,幸福(左), 愛(右), 家人, 閒情

熱海溫泉

開班教學生做日本公仔o既朋友何小姐，每年秋季例必往東京入貨買材料。去年較o岩時間跟我一齊去買貨之餘，仲去埋溫泉同我過生日，記得佢請我食o左一餐四萬幾yen o既神戶牛火鍋o忝。
幾個月前，何小姐已經叫我訂埋佢機票，9月一齊再去。碰著日本o既"白金假期"，機票酒店都非常緊張。要訂溫泉旅館就更難。唔要咁遠，要有露天風呂，要食得好又要有溫泉街行。搵o左一餐，最後決定去好耐無去o既熱海，由東京站坐45分鐘新幹線便到。假期房價好誇張，比較近沙灘或半山的話，閒閒地都要三，四萬yen。終於搵到一間離車站只步行三分鐘，又合晒以上條件o既，一泊兩食收二萬yen，ok喇。
旅館本身比較舊，風呂亦不算大。勝在近車站近商店街，職員好親切，海鮮晚餐非常豐富，絕不欺場。例牌o既各式前菜之後，主食除了一隻共有八，九種魚+貝類刺身o既魚生船，仲有一隻大鮑魚刺身，每人兩隻炭燒大眼螺，每人一隻跳舞鮑魚牛油燒，每人一個細海鮮鍋..仲有銀杏雞肉釜飯&甜品。好彩o係房開餐，可以慢慢嘆，食完飽到唔想企起身!
熱海呢區，客人都係上年紀居多，暫浸完溫泉可以買海產番去做手信嘛。溫泉街內有幾間精緻o既咖啡店，唔錯o架。其他店舖都係賣鹹魚，尤魚干，漬物之類，廖太團友肯定中意草津多o的喇。

演唱會驚喜

為o左應酬二歌今年o既巡迴演唱，呢4個月每隔3星期就去一次日本，搞到好多應該做o既工作都未完成。加上月前家母離世，屋企隻貓王又年老多病，老實講真係覺得身心好疲累。
9月24號係二哥演唱會o既FINAL，本來抽唔到飛無得睇。幸好有日本朋友知道我25號生日，就好落力咁替我四圍問，終於找到有人讓出一張，等我可以o係CC Lemon Hall同二歌迎接生日!雖然位置o係二樓，不過係最前排正中。總之入到場就好，坐邊度都無所謂啦。
難道二哥知道我在場, 要俾o的驚喜我？ENCORE之前，佢講話好想去一o的未去過o既地方演唱，例如台灣，韓國等。又話自己以前o係香港好出名，突然仲用廣東話講"我係澤田研二"! 哇哇...廿幾年未聽過喇，眼淚都流! 日本人聽唔明，我明呀!
完場後，一o的認識o既日本fans都走埋o黎同我講，二哥俾o左份大禮你呀。無錯..我照單全收，乜野唔開心都
借歪先。ありがとう、ジュリーさん！