RAINY BLUE: 7月 2009

潮物耳筒

去日本前，朋友托我同佢個女買副"mix-style"耳筒，先知道呢樣o野o係香港好多妹妹仔都想搵o既潮物。其實只係一副inner earphone，賣點係顏色設計可愛，適用於一般MP3同ipod而已，￥2500又唔係太貴。網上話HMV，TOWER，TOKYU HANDS都有得賣，去晒幾度原來係無o既，終於要跑到原宿間所謂本店，仲係落住大雨o添。點知個一百零一位店員遲到，等o左個幾鐘佢先返，好在樓下賣煙o既嬸嬸好心招呼我入佢舖頭坐咋。聽個店員講，由於佢地仲未有海外分銷，確係好多香港人去入貨，然後水貨價賣出。其實我又唔覺好特別o者，真係咁興咩？

又有新玩意

去日本必帶o既prepaid phone已經用o左十多年，終於都要同呢個號碼拜拜喇。今次去到一開電話就收到SOFTBANK口訊，話明年初開始就唔再有2G服務，所有客戶都要換3G。橫掂現有個電話只剩番千零Yen,快快去換個算數唔駛煩。而家買prepaid phone比以前簡單，只要帶護照同一個日本地址就可以。不過prepaid機款式就無乜得揀，呢個samsung821SC 係佢地介紹，原本有5，6隻色，而家仲只剩黑白兩色，我要o左白o既。200萬像數相機，其他功能都齊，最好玩係可以聽電台，睇即時電視，當然只可以o係日本用啦。價錢又唔貴，7000Yen有找。

夏天食河豚

22號睇完日蝕，下午就入去大宮，因為約o左我餐廳o既partner食晚飯。呢間叫"福膳"(fukuzen)o既地道日本料理，係海鮮專門店，門面細細但相當有名氣。我partner住大宮，同店主兩夫婦相熟，所以我地每次去都有特別介紹。河豚(雞泡魚)一向都係冬天先有得食。大熱天時，店主居然話北海道有河豚運到，一定要試試。淨食刺身，都幾鮮甜，不過我喜歡爽口o既魚皮多o的。食完先記得，無影相呀!另外兩樣游水海鮮(店內有個大魚缸o架)：上到臺o的鬚仲會郁o既魷魚刺身，又係好爽脆，食完肉就將o的鬚上粉酥炸。大大粒o既新鮮海膽，睇下就知好好味。山菜釜飯已經食唔落，被人迫我打包返酒店消夜!

二哥TALK SHOW

因為二哥o既talk show，我有機會體驗到o係日本高級酒店o既法式晚餐。橫濱Royal Park Hotel三樓大宴會廳，筵開42席，共有420位來自日本各地o既二哥迷o黎聽佢講o野，當然我係HK代表啦。大酒店真的很講究，會場佈置得宮殿一樣之外，由地下開始就有制服整齊的男女侍應接待，帶到入座，order埋飲品。6點半準時開飯，5個course包括前菜鮪魚軟芝士沙拉，海鮮湯，玫瑰雪葩，主菜是香煎牛柳，還有甜點三款，紅白酒任飲。大酒店即大酒店，每道菜都係美觀又美味，四百幾人o既上菜時間可以幾乎同步，確實唔簡單。每臺有侍應三人負責，仲係放碟都唔會有聲咁仔細o架。晚餐時候可以任你影相，但二哥出場就要收埋相機喇。飲埋咖啡收晒臺，二哥o係7點9先出場，一個人講足個半鐘，無唱歌o架。今次幸好有朋友替我訂到入場券，個位仲係全場正中面向住台，連帶我入座個哥仔都話最正。我就係一直線咁對住二哥180分鐘喇，代價係￥24000！

日本近日話題

o黎到東京幾日，每日新聞o既前線話題，除了"右口"首相終於認衰宣佈解散國會，準備再選之外，22號o既日全食亦係眾民關注o既大事。因為佢地稱為"皆既日蝕"(日全蝕)上次出現已是46年前o既事，好多人都未見過o架。當日雖然街上行人個個頭愕愕，可惜一直落雨，只有中午時份見到幾分鐘而且。我剛好在新宿街上，有幸見到蝕o左少少o既太陽，不過只係3分鐘。
今個星期六，又有大事舉行，就係日本三大煙花匯演之首o既"隅田川(淺草對出)花火大會"喇。電視台連日來都發表邊度邊度係睇煙花o既最佳地點，我諗o個日一早開始好多人就要去附近霸位喇 !又唔駛預我，因為我要去大宮睇二哥演唱會，好彩同淺草係相反方向o者。

雨之櫻木町

中間這棟就是７２層的酒店，也是Landmark Tower的一部份

近年去過橫濱3，4次，每次總是下雨天，十分掃興。今次為了二哥的dinner show再去，又是同樣！黑！二哥演出的地點，是櫻木町站旁的ROYAL PARK HOTEL宴會廳。為表支持，我決定入住一晚同一酒店。原價近￥40000的房間，因為早兩個月前預訂，居然只收￥12000！抵！我住的是５２樓，可以望到整個橫濱市啊！
Dinner show由６點半才開，一早去到放下小行李後，先往隔離的Landmark Tower69樓展望台睇景，竟然忘記外面正在下雨！而售票的也很公道地打個七折，￥1000減為￥700，還附送一張價值￥400的飲品券，又抵！坐上自稱是世上最快的電梯，只需４０秒便到達６９樓。電梯門打開，一眾遊人都大叫”噢”....望著外面一片白茫茫，不知是雲還是霧，只可以依稀看到較近的景物!意料之內，所以亦不太失望。而且展望台剛好有水族展覽，看看小魚兒聊勝於無啦。哈哈...
展望完畢，再落下面巴士站在坐觀光巴士，￥２００便可以舒舒服服環遊市內景點，不用被雨淋。橫濱市除了中華街之外，實在是一個寧靜又很有懷舊色彩的地方。古舊的洋式建築物，山坡上的獨立洋房（二哥都在這裡住），還有小小的商店街，都很值得一遊。

九號風球後

今次個風真係好厲害，好耐無見過9號風球喇。
ANA真係無鬼用，個網頁成晚都無航班資料通告，今朝6點打電話就得錄音話過o左辦公時間，俾個號碼叫人打去機場問，原來只係熱線，按號碼按到手軟都接唔通，電視新聞又無報航班狀況喎，有無搞錯!原本班機開9點九嘛，唯有照約定7點落樓等book左o個架車照去機場。同司機講起，佢即刻俾另一個話一定有人接o既號碼，先至問到班機要延遲到12點九先開，真激死!
雖然航空公司補番一張$50飲食券，可以坐低食個BRUNCH，不過都要貼三十幾蚊呀。
好彩天氣轉好，班機遲o左3個鐘都飛到，到東京已是黃昏6點，由於呢幾日係長週末假期，塞塞車出到新宿差不多8點半喇。放低行李快快去醫肚。
東京天氣也很悶熱，30度，還好無落雨。