再戰寶島

一行七眾遠征北海道+大阪9日，再同Connie&Jeffrey加多三日東京，真係行夠，食夠，買夠，玩到夠。以為可以抖番幾日先開工，點知落機翌日，朋友何小姐已經電話到，話我應承過同佢去台灣，問我26號去得唔得。嘩，傻咩!機票都買唔切啦!終於為了卻佢心願，29號起行去三日，多都唔制喇!(攪到我去唔道廖太飯局o忝)
講番我同Connie&Jeffrey去東京，即晚就去o左吉祥寺，因為約o左朋友Tony&Roy食飯。雖然無乜時間行o下o的舖頭仔，不過佢地話呢一區甚有特色，下次會再o黎。Tony訂o左位去食日本燒餅(お好み焼き)，唔同京都o個間，呢度要自己郁手o既。鋪頭單字叫做"粉"，係間好舊o既民居。當晚所有房都滿客，剩番一間無得揀，入到去先知原來好搞鬼：房內o既牆上貼滿日本5~60年代o既三級電影海報，男男女女肉帛相見，好彩大家成年人無乜尷尬。我地話如果阿四+阿二o係度肯定會嘈到拆屋喇。其實全晚都係Tony負責燒餅，我地等住食。佢地幾個年紀差不多，所以嬉嬉哈哈開心又一晚。
第二日o既節目係shopping，一早由酒店出面間文具店開始，到電器店，再過小田急間b仔，黑牌&藍牌，各又有收穫。中午小休，o係上面和幸食炸豬扒之後，過去TOKYU HANDS hae足半日，反而無行高島屋。意外o既係居然俾我地見到近期難得出現o既~黑炭妹! 哈哈哈，真係好搞o野，全身怪雞裝扮，一頭又藍又紅o既長髮，塊面~黑o既，仲o係兩眼同兩唇度畫o左幾條白線(唔係圓圈喎)，十足"海人"咁。我同JeffreyO係佢身邊行o左好多轉想影張正面，結果都係唔敢，驚俾人追殺喇。我影o左佢後面，有張側面問Jeffrey啦。
o係高島屋5/F"高野"食個鮮果甜品下午茶之後，再落番TH樓下，搵埋Jeffrey媽o既手信~UV防晒遮同其他小玩意後，大家決定收工，晚飯去。由於購物行程緊湊，都係放棄去"繼之介"，改而去Lumine上面食韓國料理，幾唔錯o架。見到隔離食雪糕，我地又流晒口水，叫一客芒果刨冰雪糕三個人食，好韓劇feel呀!!
東京最後半日又係買!JEFFREY要搵佢中意o既黑牌polo恤，Connie要搵佢好恨o既藍牌袋袋。0101都無，就去埋伊勢丹，可惜一個無size，一個無新貨。我呢，見到個b仔o既伊勢丹限定版藍白波點袋袋，即買!去"卵と私”encore多次香港食唔到o既蛋包飯後，差不多夠鐘去機場返大阪喇。估唔到羽田機場有咁多店舖，淨係試食芝士餅，已經可以飽肚!返到大阪夜晚仲有節目，encore完"千年之宴"就同Connie去CD店買RAIN o既最新CD,仲要探多次間難忘o既7仔。
旅行相仲未得閒upload，呢幾張係手機影o既，睇住先啦。