RAINY BLUE: 10月 2008

首次上京

東京去過無數次，北京就從未踏足過。今月有機會上京喇，朋友何小姐同佢兩個女+由美國返o黎兄嫂&細妹，搵埋我組自遊團，25號去29號返。佢個女係MARRIOT HOTEL職員，所以都係由佢負責book房&車，我只係跟住行就得喇。近日膝頭痛又發作，希望唔駛行太多，我只想去睇o下"天壇"咋。
有糖尿病，膽固醇又高o既何小姐，已經諗緊要食幾多隻大閘蟹，相信佢o的女實會"及"住佢!

占士邦壞人系列手錶

占士邦新片仲未上畫，就已經同SWATCH合作出o左一個"007歹角系列"手錶，連埋新o個套"QUANTUM OF SOLACE"，有成廿二款之多。雖然已經戒買SWATCH 好耐，不過店舖姐姐仲記得我，叫我去望望，加上007都係我偶像O忝。估唔到007個頭號敵人BLOFELD經常抱住O個隻白貓都被列入歹角，代表佢O既白皮帶錶，我要!另外，LIVE AND LET DIE 有隻膠帶全夜光錶好特色，買o左俾亞女。幾百蚊玩o下就好，有幾隻要成二千蚊就免喇。

同福娃晚飯

Janis過大海工作未夠一年，已經頂唔住澳門沉悶o既生活同埋每星期來來回回o既疲勞，終於決定回歸香港，下星期就返o黎上新工喇!前日專登過去幫佢執o野同搬家檔，佢公司有幾個俾佢稱作"福娃"o既年輕o既同事，聽見auntie駕到，就話要一齊食番餐。本地人帶路梗係好啦，去佢地話平靚正o個間新濠仔記，地點o係比較遠o的o既黑沙環。門口有好多海鮮缸，入到去果然十分客滿，差不多臺臺都點佢地o既招牌"泰式花蛤蟹鍋"，我地5個人仲加"黃金蝦"，半隻"沙薑雞"，"金銀蛋莧菜"，"鐵板玉子豆腐"。個鍋一上就已經眼都大! 一個14吋大鍋，放滿晒蝦，青口，螄蚶，大花蛤等等仲唔止o架，還有一大碟好新鮮o既赤貝同三隻花蟹(Annie Lam實會好開心)!黃金蝦唔太鹹好好味，一碟有十二三隻大中蝦。沙薑雞又係招牌菜，非常軟滑入味。其實個火鍋已經好難食得完，其他幾樣又好夠份量，梗食到捧住個肚啦，又係眼闊肚窄之過。埋單只不過六百零蚊，抵食!

BAR GIANNI

[繼之介]因業主重建物業而停業後，拍檔仍不忘餐廳生意，終於決定o係位於同區的另一酒吧加設晚餐時間，與一位做意大利料理o既廚師合作，供應pasta之類o既light dinner，今次去東京也順道試試。Bar Gianni並非一般很吵鬧，煙霧瀰漫，音樂聲蓋過一切的酒吧，而是十分cozy，可以靜靜地飲酒談話的地方。新廚師做了海鮮沙拉，炸黑豬扒，奶油肉粒意粉，加甜品雲喱拿mousse。唔....雖然比不上以前[繼之介]的大廚，水準尚算唔差。12月初同朋友睇完二哥演唱會後，會再去開慶功宴(哈，我地自己o既)，仍然 OK 的話，可以請廖太團去試菜喇。

火鍋食放題

早前同住o係日本o既Tony去過一間o係吉祥寺o既火鍋店"なべぞう"，每位大約￥2000，牛/豬肉+菜火鍋，90分鐘任食，且有4種湯底選擇。所有材料十分新鮮，店舖亦清潔衛生。最近發現新宿三越附近也開了分店，不得不去幫趁。晚飯時間比夠較人多，要等廿多分鐘才有位，也不算過分。一坐低選了清湯和豬骨湯底，便先上豬牛肉片各2碟和蔬菜。其實不太大食的話，睇見都幾飽喇。我地終於點多了兩碟牛便收工，時間o岩o岩好。
下次廖太東京團不妨去試試。

MOTHER 牧場

MOTHER牧場

房總半島一日o既下半場係參觀近來有o的香港團都會去o既MOTHER牧場。又係成個山頭咁大，分山上同山下兩區。去到已見停車場滿晒，原來本好多地人一家大細o黎玩!我地團係賞秋櫻團，所以一車就到山上，自由時間只得個半鐘。場內多數都係o岩小朋友o既設施，又可以見下小動物，有食店，土產店。牧場最有名就係自家出產o既乳類製品，我地只敢小試一個芝士味雪糕咋。山上氣溫低又非常大風，所以望見o的花都開得唔夠燦爛，我地便入去跟小朋友睇羊咩show避寒，細路仔o野，得啖笑! 之後，坐小火車巡遊真正牧場，遠途可以見到各類o既乳牛，馬，駝鳥，羊駝，仲有好多好多o既羊。我地仲可以落車餵羊仔，又有牧羊犬表演趕羊群。點解o的羊係要俾狗"恰"呢？第一次咁近距離接觸羊仔，佢地o的毛真係好軟o架，冬天買番隻攬住就暖晒!火車tour整整一小時，剛好集合回程。

今晚做乜鬼，upload唔到o的相，聽晚再試。

郊外一日遊

九月尾去日本，公司還未有新貨上架，所以寧可選去郊外吸吸新鮮空氣好過。出發之前上網找到個一日遊o既local巴士團，節目包括有：去東京東南方o既房總半島一個無花果園摘無花果，再去一農場執栗子。中午有壽司懷石午餐，下午去Mother牧場賞秋櫻，回程經千葉縣木更津o既海ほたる(海螢)海產商場買手信。由早上8點半至晚7點，收費￥12000有找，都算幾充實。而且，無花果&栗子都係合時果物，對於我地城市人來說，真係無乜機會自己摘o架!
由於當日為星期日，團友都以家人朋友為多，好奇怪係無細路，大概團費唔平之故吧。
乾o既無花果食得多，新鮮o既都係近年先食到，一向只知產於巴西和以色列，原來日本也有! 無花果樹唔高，園主叫我地唔駛揀太紅的，唔好大力按，因為成熟o既果身很軟，用力就爛。一入園便每人先來一個試食，真係好..甜!但係呢種生果價錢唔平，所以每人只可摘5大個，想要多o的便要付錢囉。其實一摘下來，也留不到多久，因為很快熟的，即日便要處理掉，想帶返香港都唔得!
栗子園面積有一個山頭，好大。熟透的栗子會整個由樹上掉下，所以唔叫摘而叫執。連外殼的栗子像箭豬似的，很可愛，朋友老早講定要拎個走。哈哈，千祈咪呀! 原來箭豬殼o的刺好尖，輕輕一觸已經入肉，我地幾隻手指立即中招，怪唔知有o的日本人自備勞工手套啦。栗子跌落地唔得用手，只可用腳踩開個殼，就見到入面3粒啡色栗子，好有趣(有趣到忘記影相)。其他local團每人可執50gm，我地參加o個個就可以有1kg，唔知係貴o的定有名o的呢？日本栗子的確比香港見o既大粒，味道就差不多喇。總之，未玩過就特別開心!帶返o黎都食都兩餐栗子炆雞。
壽司懷石午餐o係途中一間日式小屋進食，幾唔錯o架。
日本其實有好多呢類o既本地團，每個季節都有特別行程，價錢有平有貴，安排得很週到。只是，外地人完全不懂日文就有些麻煩囉!

高+貴生日晚飯

跟舊年一樣，今年又係同番同一個朋友去日本過生日。未去之前，何小姐已經講定要請食飯同我慶祝，叫我諗。以前去過六本木一間出名食神戶牛同埋蟹肉shabu shabu o既"瀨里奈"，而家o係新宿都有分店，一於決定呢間，上機前訂埋位先。話高+貴，係地點位於新宿住友大廈52樓，夠高，睇夜景一流。貴，就真係幾貴。我地點o左招牌o既神戶牛肉(6大片)& 蟹腳(5隻腳2隻箝)shabu shabu 各一客(包前菜&蔬菜甜品)，另加一客串燒銀杏同300ml清酒。牛肉入口溶，蟹腳..而家仲想食呀!上級材料+夜景靚位+細心服務+名店招牌，埋單￥40000無找，差唔多啦。多謝何小姐，出年又去邊呀？