暫別樓下間星巴克

有好幾個星期無入去樓下STARBUUCKS飲咖啡，今晚老公&佢o的舊同學搵埋我地去傾計，先知道呢間店聽日就係LAST DAY，真係有o的shock ! 不過原來佢地十一月會再開番，只係搬上二樓現時麻布茶房個位，當然係闊落o的。而麻布就會搬入入面商場鋪位，又係擴充o左啦。

小毛回娘家後.....波士=謝晒

今晚約o左阿女夫婦加佢個舊同學肥豬仔一齊再去Piann到食飯兼探探波士。一上到去，水淨河飛~係話唔見公關波士好似平時咁出o黎迎賓，只見佢懶蛇咁攤o係張凳上面，有人o黎都唔郁。Piann話，上星期六小毛番自己屋企時番轉頭望佢好多次，但隻衰鬼仲懶瀟洒咁唔"蘇"人，點知第二日就開始單思病發作，幾日都無晒心機，乜都唔玩，拍都唔落地，個衰樣真係好鬼可憐!我地話佢梗係俾小毛鬧慣o左，而家耳根清靜就身痕啦。
我地今晚食o既係神秘menu，Piann話廚師自己發辦。頭盤係上次都有o既露筍蝦卷/燒帶子伴蕃茄，湯係蟹肉南瓜湯(勁多蟹肉)，二度係脆皮乳鴿~Piann話呢個係佢地兩公婆o既消夜美食，係真正o既私房菜呀。果然皮脆肉嫩，我同阿女唔食鴿o既都要俾面!主菜有黑毛豬扒/煎游水大蝦配黑菌醋汁(呢樣係廚師極力推薦，佢話好少見到咁大隻游水蝦)~~又係豐富o既一餐!

鬍鬚伯伯私房菜

跟gloria同一天生日o既朋友請食生日飯，地點係柴灣一間工廠大廈上面叫做"鬍鬚伯伯"o既中式私房菜。主持人顧名思義係一位二撇雞，佢日間o係度經營時裝及洋酒業務，晚上就做菜館，可以筵開5~6 席。呢度食o既唔會係鮑參翅肚，而係比較有特色o既菜式，有興趣飲酒的話，鬍鬚伯伯仲可以為每道菜配埋紅/白酒。菜式包括有：上湯煲大蜆，杏汁白菜豬肺湯(雖然我唔食肺，但燙極好味，真係用杏仁磨)，雷公[苦瓜]蟹煲，金沙桂花魚，辣汁[用wasabi+芥辣]蝦球，龍井燒雞(全晚至正~茶味雞味十足，單買都要$300)，南乳金針炒雜菌，士多o卑利骨，甜品係芋頭紫米露(較弱喇)
呢間o的o野都做得幾好味，份量又足。不過由佢配埋酒就似乎有o的扮o野，伯伯話要先sip啖酒，食啖食送再sip啖，先飲到o的酒o既味喎~真係晒鬼氣!十個菜飲o左十隻酒，幾乎失守!!
我地9個人，以為最少要每位三百幾，但問o左我朋友，原來只收二百五，咁連埋酒就真係算平囉。不過地點就較偏僻，都唔會好多幫趁喇。

終於都要打針

左手姆指第一節屈唔到，已經困擾o左我成個月。去澳洲之前睇過普通科醫生，佢話係條筋有問題，建議我去睇骨科，但因為趕住出門，所以只係食消炎藥頂住。幾星期以來，一直無進展~"直豎姆指"而且越來越痛。返港後立即預約番睇開o既QM骨科周教授，今日上到去俾佢話我咁遲先睇。呢隻係叫"彈弓指"，由於手指筋膜發炎脹大而將關節包住，所以屈唔到，即使勉強屈一o下都痛到入心。起因可能係拎重物時錯用力道而受傷，目前已經係第二期，可以打一針類固醇，如果進入第3，4期就要動手術喇。雖然知道打呢隻針可能會有後遺症，但教授話現時係唯一方法，仲話希望一針無事，否則要再打多次。打呢針毫不簡單，因為會甚痛，因此先要在患處旁邊打麻醉藥，然後再直接打入條筋...果然痛到標眼淚(；_；)!!!未來一兩日會更痛，之後先會逐漸好番喎~~希望啦啦!