俾姓李o既玩o左一日

昨日一早，隻手機開始有o的怪怪。o係sogo B2食緊早餐，已經收唔到幾個電話，仲以為係地底關係啦。出o左街之後就不斷有人打錯o黎，跟住收到annie短訊話想搵我，但我飛錯o左線。我無飛線丫，於是想覆番佢，先至發覺打乜o野都唔打唔到，嚇死我，以為手機都壞埋。。當時行到波斯富街，準備入去3問問。點知門口已經成堆人o係度嘈緊，一o的話無晒線路，一o的就飛亂晒線，一個阿嬸話打返屋企搵老公，有女人接電話，佢仲以為家變o忝。哈哈，原來唔關我手機事!幾個鐘後先通返咋!
夜晚想上網，又上極都唔得，唔知乜事。快快關機，好驚又有木馬啊!
好在而家無事喇!

很豪的午餐

炸連皮垃魚



蟹肉汁炸豆腐

我老友Rita生日同我差兩日，今日Janis 話請我o地食午飯，要豪o的去IFC國金軒。貴一件事，但係都全院滿座o架。我o地3個人叫o左最平o既商務套餐，有例湯，3個小菜，點心拼盤3款，炒麵+甜品，點碟頭幾大，都食唔晒。每位計係@$280 加埋茶錢之類埋單剛over一千蚊。如果四個人叫就會多一條蒸魚o忝。
夜晚到糧尾兩公婆同我食，去o左開張無幾耐，東角驛上面o既"雪村"串燒日本料理。其實昨日已經去過食lunch。o個度類似中上級o既居酒屋，午市有套餐約$80~~，夜晚就無喇。質素唔差但亦唔平，所以唔滿座。吞拿魚刺身，3薄片賣$150，不期然諗起"北澤"喇! o個度有房可坐8人，但要收最低消費每位四百結果我o地都係千二蚊埋單。原來呢間o既老闆就係味千拉麵+板前迴轉壽司+"和味無窮"節目主持人Ricky，佢夜晚都係度坐陣!

多謝各位

活o左幾十年，生日已經好似無乜感覺，只係好開心無驚無險又過o左一年。
各位朋友&廖太請食飯之餘，又送o左好多精美禮物，po上o黎o既之外，仲有丁丁親手印製o既貓貓月曆。真係好多謝，感動呀!! 照例都係好老土o既願望..人人都開開心心咁過每一天，最緊要係身體健康!

永別，Mary

一個識o左三十幾年o既朋友，幾年前患上乳癌，因為醫得太遲，癌細胞先後轉移到尾龍骨及腦部，返香港醫o左半年，終於都被打敗，走o左喇。
Mary廿幾年前嫁o左去日本，生o左個女。數年後，老公患上白血病，一直醫o左十多年，至舊年先再發病逝世。期間Mary自己亦發覺胸部有硬塊，不過佢掛住照顧老公同個女，一路都無去檢查。直至好唔舒服先睇醫生，但已證實係惡性腫瘤，即使割o左一邊都開始擴散到尾龍骨。老公過身後，佢返o左o黎香港醫病，因為起碼有家人陪伴，飲食都有人照顧啦。可惜癌細胞再擴散至腦部，令一隻眼失明。近幾個月，佢出入醫院，瘦到不似人形。就o係我由日本返o黎o個日，佢好安祥咁大解脫去喇。今日，佢家姐先通知我。傷心....

日本行諸事 4

9/11~Moly&Lio既5日4夜行程，除去頭尾兩日，一日睇Jerry，一日去迪士尼，其實只得一日觀光行街兼購物，簡直係唔夠喉!
又係十點出發，去到原宿食個咖啡+bagle早餐後，入snoopy town 打個轉就直落竹下通。原本話唔會買o野o個兩位團友~哈哈..居然o係￥100shop度做大豪客，Li勁買o左成萬yen!食埋晏出o黎竟然已經3點幾，下站應該去o既澀谷決定取消。因為佢o地一袋二袋，仲點可以繼續？唯有先返新宿車站搵locker放低袋袋，坐大江戶線去台場。當日天陰，到步時已開始天黑，匆匆影o下自由女神同彩虹橋，就想上富士電視台，點知撞o岩星期一休息，拜拜!結果一路行附近商場都行到9點，青海站都去唔到。坐返海鷗線去Moly最想去o既汐留Caretta，上46樓o既"嚮"日本料理食晚飯兼睇夜景。好好人o既妹妹仔安排到我o地窗邊位，對住台場夜景，果然係享受。不過代價不輕呀，埋單近一萬八千YEN ! 廖太可以不去也罷。
9/12~CHECK out後帶佢o地去東口伊勢丹行，之後預算去北澤食美味壽司o黎結束呢次東京遊，誰知...裝修呀!落返車站裡面o既"沼津"迴轉壽司，唔係好差，不過邊有北澤咁正丫! 失望!
Moly & Li，下次去日本要預多幾日喇!
仲要一提，成田機場重開o既Terminal 1南翼，有好多新店鋪，真係要你用盡o的￥&$為止!

日本行諸事 3

9/10~今日Moly&Li去迪士尼海洋，我七月已經玩過迪士尼，唔想咁快又去，所以免役。而家由新宿去，o係南口有高速巴士直達，花2小時+￥600，非常方便，唔駛先去東京站再轉京葉線咁麻煩喇。
一早送o左兩個上車，就爭取時間，先去agnes b.擺抵隻錶修理，然後走晒新宿東西南口，買齊要買o既，已經一點幾。行過高島屋4樓[高野]，實在忍唔住o的甜品誘惑，入去點o左個本月特色"黃金桃waffle"當作午餐，美味!呢間果物甜品店，廖太們下次記住要幫趁。好快咁掃晒碟o野又要起行，趕返酒店擺抵o的貨物，沖埋涼(天氣好熱!)就出發去下半日o既節目~SMAP 15週年演唱會! 地點：國立競技場~呢個6萬人o既場地，由新宿坐大江戶線只需2站4分鐘車程。
SMAP仍然係日本o既頭號偶像，佢o地每年一度o既巡迴演唱會已成為一項盛事。話就話5點半開始，但我怕人多已經預早兩個鐘出發，果然車站內已經人頭湧湧。o係閘口企o左不少買唔到飛o既歌迷，好期待咁舉住問人有無飛出讓o既牌，更加水洩不通
演唱會準時開始，SMAP五子藉住o威o也由18米高o既台頂直飛到30米長o既catwalk台上，呢招天外飛仙，已經令人口定目呆。6萬人參與o既露天演唱會，就有六萬支螢光棒一齊閃動，六萬人大合唱，加埋煙花及激光等效果，場面真係好靚，好感人。但係都唔及得慢慢升上夜空中o既一輪明月，真係襯晒佢o地首"夜空的那方"! 雖然五子年紀已經唔細，不過跳舞一o的都輸蝕，仲有個人表演o忝，除o左中居正廣，佢早前傷o左腳，小腿仲紮住硼帶。"世上唯一的花"係SMAP近年o既大熱歌曲，當然留到encore先唱，仲抽o左5位觀眾上台同佢地一齊跳舞，o個幾個簡直開心到唔識行咁滯!
演唱會o係9點結束，急急趕往會場o既另一邊買紀念品，行足15分鐘，氣都咳! 途中見到會場周邊居然坐滿買唔到飛o既歌迷，就地聽歌賞月，一樣咁開心!

日本行諸事 2

9/9預定o既行程係參加JERRY首次日本FANS見面會。雖然話十一點開始俾海外fans取入場券，我o地一早去到，排埋隊買紀念品，差不多12點都未見有工作人員出o黎。等到幾乎發火再問，先叫我o地入去。鬼咩，佢o地o的工作人員忙住o係counter招收日本會員，條龍成條街咁長，真係收錢收到手軟，邊有時間理我o地丫!
Moly&Li兩場個位都好後，極唔開心。我就一場三十幾行，一場第4行，好少少啦。
一身黑衣配短靴的JERRY，帶住佢個迷人酒渦出場，好努力咁用惡補返o黎o既日文作開場白，當然立即殺死唔少o架妹o架姐啦。節目安排唔差，一位日本男主持+ 一位女翻譯，跟JERRY作談話式訪問，氣氛十分輕鬆。其中穿插一o的佢o既生活片段，例如佢拉狗行街街，入廚房煮食，打籃球&桌球等。睇完至知原來佢打桌球真係好醒，佢仲話vanness皆因經常輸波，俾佢被罰做掌上壓做得多先有而家咁大隻喎! 無現場玩遊戲，不過佢有射籃球，得淡笑啦! 其後抽出5位觀眾可以問問題，其中一位問佢幾時會再去。JERRY答話好快，仲係會同另外3個去做演唱會o忝。咦..咁係咪意味住..我o地要開始儲定旅費呢？最後，換過套白西裝出o黎唱"一公尺"& "我是真的真的很愛你"，有無走音？呢o地估o下啦。
呢個日本見面會真係為日本fans而開，因為翻譯只係譯俾JERRY聽，唔會對台下講，所以唔懂日文o既港台觀眾只聽到JERRY講o既o野，其他就唔明。來自泰國，韓國o既就完全只有跟住人o地笑囉。
原本諗住日場完結後有3幾個鐘空檔，可以帶兩個行o下銀座，點知遇到個識得o既o架妹fans，要一齊飲杯茶食件餅，咁又無o左節目囉!
夜場o既節目幾乎一樣，完場後o的觀眾賴死唔走都無再出，七千幾YEN睇晒喇!
o係日本睇演唱會，o的觀眾好守秩序，最多係企起身，絕對唔會有走出位，衝上台之類o既行為。唔知係咪今次o既fans有o的o黎過香港或台灣睇show，居然o係JERRY唱歌o個陣衝出台前，搞到場內o既[食蕉]措手不及，攔都攔唔切，台上o既人又唔熟性，仲同佢o地握手，好混亂。夜場又係咁，不過[食蕉]急急call人幫手，大隻佬一到，執雞仔咁"deng"番晒落位，唔駛兩分鐘清晒場，仲勁過STANLEY TEAM !

日本行諸事

今次o係東京幾日，出乎意料地熱，太陽又猛。我最怕呢種天氣，因為出入冷氣地方，好易攝親，屢試不爽。果然一返o黎，感冒就跟住到，馬上要幫趁何醫生!
9/8到達新宿，check in埋酒店後已是六點幾，係咁意帶Moly&Li行o下車站附近，大家都覺得要先醫肚。按照行程，首晚應該食牛肉sabu sabu，但原來Li因宗教問題係唔食牛o既。無問題，有另一間火鍋店[唐人凧]除o左牛仲有雞泡魚呀。咁Li自己單挑雞泡火鍋，我同Moly就食牛+雞泡+蟹腳sabu sabu套餐。因為大家肚餓掛住食，連最靚o個碟雞泡刺身都唔記得影低!甜品係麥茶味雪糕，第一次食，好味呀!
飯後出o黎，鋪頭已經無得行，唯有早早休息，準備明天睇旭旭。

附加節目~SMAP

終於搞掂o左Moly同阿Li個行程。10號佢o地二人行玩迪士尼海洋，我自己有一日shopping。11號再一齊逛原宿，澀谷，去埋台場，夜晚上Cretta汐留46樓食豪華晚餐，夠晒充實。希望佢地盡興之餘，唔會俾我趕到氣咳啦!
今晚收到花姐電話，問：你近日會唔會去日本？我：星期五去喇。問：咁你10號晚得唔得閒睇SMAP演唱會呀？
我：SMAP？!得呀，得呀，有飛咩？花：有個DJ訂o左飛，臨時唔去，又退唔到飛，咪搵人睇囉。
he he~~咁我shopping 完又有節目喇，演唱會6點至8點幾，o岩o岩夠時間~去車站接番Moly佢o地。

五日四夜行程~頭都大

呢個星期五就出發喇。同埋Moly & 阿Li一齊去日本支持o下契仔(耐無咁叫佢囉)個見面會，二叔演唱會都有去，無理由丟低呢個o架。
Moly同阿Li都係第一次踏足東京，梗係要幫佢地plan plan行程啦。佢地買o左個5日4夜o既package，就俾o左一堆想去o既地方，叫我計畫計畫。o下....東照宮，富士山，迪士尼海洋，品川水族館，上野公園，濱漓宮海濱公園，宮崎駿美術館，台場，水上觀光巴士，澀谷，原宿，汐留..仲未計新宿，池袋呢o的必去點喎!不過，睇真o的，原來係無乜行程可言，事關係無時間。頭尾兩日唔計，其實只得3日。9號o個日要一早去有樂町領入場券，跟住睇1點日場，完o左都可以逛o下附近o既銀座，食o下o野，然後再返去睇埋6點夜場。8點完場後食得晚飯已經十點幾，早抖!第二日去迪士尼海洋的話(佢地一定要去)，就無埋呢日。剩低第三日，點塞其餘o既地方呀!佢地兩個未去過，唔知日本o既size同香港o既差別，仲有四圍都要坐火車，店鋪又早休息呀!頭都大晒!!