生日禮物

多謝各位廖太，吳太&鄭太的美味泰國餐&生日禮物。有實用o既護手霜，來年o既Moleskine記事簿，護照套，旅行岩o用o既貓貓手提袋，超可愛o既磨菇吊墜，仲有丁丁親自揮毫o既工筆菊花圖兼請佢老師題字，真係開心，開心..謝謝!! 還有..GLORIA好介紹， 請佢朋友MARINDA特別製作o既壽桃蛋糕，好睇又好食呀，唔該晒!

豪一次的午飯

與Janis及另一友人到綠楊村午飯，講起下星期便有大閘蟹上市，多口問花姐有無蟹粉，佢居然話"有，黃油蟹粉呀"。哈，三個立即流晒口水，決定豪一次，點o左個蟹粉炒粉皮，加個豆瓣莧菜同砂鍋雲吞雞。蟹粉果然勁多，夠甘香。不過食完都覺得好膩，偶而為之好喇，而且係$398+10%一碟，真係好似有o的過份!算啦，今個月生日係藉口囉。

出o左院喇!

獸醫下午通知話大貓進展甚佳，已經可以自己便便得幾暢順，所以晚上就放佢出院。哇..真係舒服晒，唔駛掛到頸都長埋!夜晚八點幾，獸醫就車到。大貓一入屋，就出廳巡一圈先返自己房，搵番個寶座坐低。我諗佢都覺得"都係自己屋企好" 掛。睇見佢都幾鬼可憐，(我估O係醫院梗係俾O的狗狗嚇餐死)足足瘦o左成圈，o的貓鬚又DUP埋，無晒威風!最緊要而家個肚細番，行路唔會痛到呱呱叫，七千蚊都抵俾啦!

大貓在康復中

多謝各位關心大貓。獸醫昨晚告知：大貓手術後精神不錯，仲十分開胃咁食o左3罐貓糧!(真係飢不擇食？佢平時只係食日本罐頭咋!)而且佢已開始自己便便，可見o的腸亦恢復活動，正在康復中。醫生話再觀察多幾日，証實o的便便無問題就可以出院喇。呢幾日，我同老公都無晒手勢，入廚房見唔到兩隻大耳朵，又無人(貓)叫，問我囉野食。老公話無貓俾佢娛樂，周身唔自在!