Gloria摯愛

前晚老公中學同班同學春茗+生日會聚餐，o係太古城潮江春四圍"走"。哈，終於見到阿四o既dream dessert....子母壽包喇!!!而家真係無乜酒樓會做o架喇，今年八月係咪要訂番一圍呢？o拿，俾張相你頂住先。

魔鬼又出動

前日做魔鬼引到丁丁加入去台灣之後，哈哈..今日又出動引o左老友Rita五月同我去日本!事源我熟悉o既旅行agent話有人抽獎抽到張ANA機票，仲係商務位，但自己唔去得，想$2500放出o黎，問我有無興趣。老實講，得一張都幾難放o架，而我又o岩o岩換o左張UA mileage票。即管試o下問Rita，佢老板居然俾佢放假，所以..我又有人陪喇! Hehe，今次幾大都要去浸溫泉囉!!!

金庸之最

同我老公捱o左好多晚夜更，連續煲o左兩套大陸拍o既，都係40集o既金庸武俠劇集"倚天屠龍記"同埋"俠客行"，終於o係前晚完工!"倚天"還算ok，除o左演員做得好o的，風景靚之外，劇情比無線o個套更加詳細，跟足原著9成。但係套"俠客行"就悶死人喇! 明明原著得兩三集，何以又會拍到40集出o黎丫？所以劇情就係咁拖..拖..拖..o的演員無個識之餘，o的做型同衫又核突。道具仲搞笑，居然見到有膠碗碟同現代o既砂鍋，乳膠枕頭等等..!老公話橫掂睇開就要睇埋佢點衰法啦。最慘就係，好辛苦咁捱到尾，個結局竟然係無結局!!!我o地幾乎要打爛電視機咁濟!!呢套唯一可取之處，又係得風景靚。我諗，呢套可能係金生較後期之作，同"射雕"時期真係有天壤之別。唔知佢知唔知道有套拍到咁差o既劇呢？我諗要買番套原著睇睇個結局係咪咁先，否則死不冥目!!!

一粒雨換o左F3

昨晚約o左幾個以前一齊做日本o野o既唱片公司朋友食飯，其中一個問我借套日文版o既"花樣男子"漫畫，為免我拎住重o野去咁遠，所以都係番我地頭銅鑼灣。明珠戲院雖近，不過好少幫趁入面o的食肆。某君提議試o下
"巴東印尼餐廳"，果然幾唔錯。有辣有唔辣，份量夠又好未味，價錢適中啦。食到肚突突每人都唔駛一百蚊。最好味係炆牛蹍，仲可以問佢要多碗汁撈飯o忝!
食o野途中梗要講o下o的圈中八卦啦。一個而家跟緊周生o既話，百事新一輯巨星廣告原來早已拍好喇，我記得o既就有周生，古仔，希仔，蔡妹，旭仔，同埋雨。eeee....van，vic 同ken 呢？無囉，就係俾粒雨換o左去喇，真係夠現實....!!唔記得仲有無鋒仔喎。

又無聲出

真係咁黑？年廿八都要睇醫生先過年，食o左幾日感冒藥以為好o左。誰知星期五晚又開始唔妥，少少咳+喉嚨痛，星期六朝就無o左聲!睇開o個兩個醫生仲未開工，唯有搵個第3選擇。而家咳少o左，不過仍未有聲呀...電話都唔聽得，好"mang"!!每逢咁o既時候，有樣o野最想做，就係去浸溫泉喇!!