東北三省八天

向來不喜歡參加旅行團兼無興趣國內旅遊，卻因為一句戲言而跟著由澳洲回港的姐姐&姨甥女參加了東北三省八天團，(地點包括哈爾濱，長春，吉林，瀋陽&大連)。也是我除上海以外，第二個踏足的中國地方。
年初四興高采烈出發，可惜出師不利，到達機場獲告知當日北京大霧，航機無法來港，因此往當地的所有航班都要延遲。我o地要在北京轉機往哈爾濱，當然要等..等..啦。結果，第一天行程就係在美心飲完早茶再過恆香軒食雲吞麵，然後去新翼消磨足足七小時。講真，o個邊新翼唔錯呀，好多食肆，商店，又有立體電影院&遊戲中心，裝修好靚，令人唔記得身在機場。戇居居等到晚上差不多八點，幾乎諗住要返屋企之際，領隊終於來電通知可以坐十點班機，YEAH!抵達北京已經半夜十二點幾，當然無機可轉喇，被安排o係北京住一晚，翌日早機繼續行程。
領隊都算識做，不停道歉又道歉，康X仲即時賠償每位400RMB，"質"住大家個口先。其實無需鼓譟啦，大自然氣候影響，誰能控制呢!
哈爾濱氣溫零下十六，七度，對我o地o黎講係好凍， 但當地已經叫做回暖，大部份冰彫雪彫都開始融化，所以有o的失望。電子產品o係咁凍o既地方會好易失靈，相機影幾張已經無電，要急急放入暖袋一陣先可以再用，加上雙手又凍到僵硬，所以o係雪地影相不太多。幸好出發前有出席茶會，先知道要帶備多o的暖包，發熱鞋墊&小型暖壺(裝熱飲)，真係決一不可。
這次所去o既幾個城市，其實除了睇冰燈雪彫&滑雪場之外，就只去參觀日o的舊皇宮，溥儀故居，甚麼甚麼廣場之類，觀光點真的不多。由於接近俄國邊境，因此好多建築物都充滿俄羅斯色彩，頗有特色，但其餘市中街道仍然甚殘舊。唯一較為現代化o既只係大連，可能有外商投資之故，單係市容已經勝過早前所經各市，高層建築物設計新穎。哈哈，仲見到兩間星巴克，o的店員又好有禮貌咁同我傾計，簡直令人忘記正身在中國。
我o地參加o既係豪華團，值錢在住o既係五星級酒店，餐食唔算太好，領隊導遊o既安排都好妥善。
不過，真的概嘆內地既要推廣旅遊，點解o的配套一o的都追唔上？排頭位莫過如公共廁所喇。黑龍江省o既松花江，o係民謠同詩詞中都聽得多，誰知o係條咁詩意o既江邊o個間公廁，可以話今次行程o既最唔衛生之冠。未入門已經臭氣攻天，成地黐立立，無水沖不只，門口仲有個大隻炳要收一蚊買路錢，你話係咩世界？好彩我o地有白花油搽鼻，有口罩+樽領衫掩口先頂得住。如果唔係要坐長途車，真係寧願忍囉。其他公廁都係不遑多讓，最衰仲有o的無門o既，你o係度方便緊，居然有人企o係個格外面牛咁眼望住你!救命!!可能係我自己見識內地太少喇!
另一樣睇唔慣o既，係威脅式強要小費。去到一個滑雪場，姨甥女坐雪地犬拉o既雪橇，其實亦有一訓練員在旁跟住，講明費用已包括小費再內。上到山上，呢個人居然趕我姨甥女落車，叫佢俾小費，否則就自己行落山。仲有其他團友都俾滑雪教練糾纏，追討小費。你話呢種簡直係咪賊仔所為？好在當地導遊亦不值此等所為，向負責人投訴之餘，更替佢o地取回已附o既全數。雖然話出外旅遊但求開心，區區十元八塊理應無謂計較，不過．．都要人真係開心得o架，係無？
經此一役，對內地旅遊o既興趣又再跌落最低點。話我係乜都好啦，下次睇雪景都係去日本得喇。
相片已upload好，有興趣請到下址看看
http://xina925.spaces.live.com