紅白初出場歌手

每年大除夕晚o既日本紅白歌合戰，近年電視已經無直播，但係我自己仍然非常恨睇，總會托朋友錄起俾我。今年o既出場歌手，剛剛o係今日開記招公佈，45組入選歌手中初次出場o既有12組，男女各6組。其中一個，我由佢21年前初出道幫佢做o野繼而成為朋友o既創作歌手首次入選，昨日收到電話時真係開心到幾乎喊出o黎!得o左喇，德永英明! 3號晚見到佢時可以親口再恭喜佢喇!
其他初出場o既仲有唱"輪舞曲"同"SUPPLI"主題曲o既絢香、今井美樹，現時勁人氣o既DJ OZMA，SUGA SHIKAO等。可惜最近太多負面話題，否則阿四早前o既摯愛KAT-TUN 都肯定有份。
前排坐中間o既就係德永

Bee Gees 不再

真係難怪阿四話唔識Bee Gees o的歌，年代唔同嘛。佢o地o的作品係我中學時每個週末開party不能決少o既必需品。有"lum"死人o既情歌又有後期o既disco勁作，紅足廿幾年，如果唔係佢地Gibbs三兄弟其中o既Morris急病去世，可能今時今日Bee Gees都係樂壇o既大band大。
大佬Barry宣佈不再演唱後，就剩低Robin一人繼續。舊年o黎過香港演唱，我去o左日本，但老公有去捧場。不過，據聞佢當晚狀態麻麻，個半鐘都未夠就完場。所以今年再o黎，我o地都無打算睇。前日，阿四話卡生有兩張免費飛，咁就益o左我o地喇!票價由$380至$980，外國歌手o黎講，唔算太貴但亦唔平，所以只得七成滿也是意料中事。
Barry Gibb講過，少o左一個成員就唔會再有Bee Gees，真係無錯。不論Robin今次狀態幾好，幾落力，但係無晒兄弟幾人最煞食o既假音和唱，所有歌就無晒神髓，總之係到喉唔到肺!好在o的歌都係經典o既流行曲，melody 好聽補番數!
香港觀眾聽演唱會仍然都係慢熱，前面45分鐘全無反應。手，無打拍子啦，唱到"Night Fever"咁o既disco beat居然郁都唔郁，莫講話企起身!一直去到最後半個鐘，先有o的人起身揮o下手，甚至衝出台前跳舞，我o地坐山頂o既，一早就做足晒喇。八點半先開始，未夠十點已經encore，而且仲係番炒兩隻唱過o既歌，真係慳皮!
我o地今晚o既懷舊節目，多謝晒卡生!

未來大廚

朋友Eliza個女Charlie，中學畢業後先讀酒店課程，之後一直o係不同o既餐廳學廚藝。前兩年去o左IFCo既意大利餐廳HALEN 專做pizza，手勢唔錯o架，而家o係喜來登酒店做法國餐。不過我朋友唔係好錫呢個女，對佢o既職業亦無甚好感。日前，Charlie參加一個年青廚師o既法國料理比賽，打低21個對手贏到冠軍，獎品係明年3月去巴黎進修廚藝。嘩，真係恭喜晒，Charlie! 終於可以o係阿媽&家姐面前威番次喇!佢o既得獎作品係Chicken Roll with Cauliflower Souffle & Apple Crumble with Cinnamon Icecream. (auntie 好想試o下你做呢個甜品啊!)
張相好細，中間o個個就係Charlie

溫泉旅館滿瀉

月尾去東京，目的只係睇演唱會，其餘時間都係行行逛逛，無乜特別行程。咁o岩有個朋友o個幾日又係去睇show，佢話好耐無浸溫泉，要我搵個唔係好遠但係又要有特色o既地方一齊去。我提議去草津，佢話我今年去過，唔想我咁快repeat，而且要五個鐘巴士喎。終於決定去大家都未去過o既伊香保溫泉，雖然都要坐三個鐘車，不過o個度係三大溫泉之一，應該去浸o下! 為o左將就大家睇演唱會，我o地其實只得1號或2號可以去。誰知上網一睇，oh! 全個伊香保區o既旅館十二月o既所有週末居然係滿到瀉，乜房都無! 得一間話有一間vip房剩，但係要近六萬日元一位，兩人咪十二萬？算吧，我唔係vip! 再睇番草津，都係一樣情況，放棄喇，人o地o既溫泉旺季嘛!
去唔成溫泉，疊埋心水搵好o野食。以前同同事成日去六本木o既火鍋店SHABU ZEN，而家o係四谷有分店喇。呢度o既牛肉shabu shabu 極之美味，三百零蚊一位就有食放題套餐。好，今次要試試呢間先。

過年去邊度？

今晚花姐msn問我農曆年有無興趣出門玩玩，佢話幾個舊同事話想去桂林，住一間好靚o既resort，又有私人導遊，人多o的好食作喎。我一口就推o左喇。因為一：我家個老人家，中意有人o黎拜年熱熱鬧鬧，唔通掉低佢自己行o左去咩。雖然過年確實係悶到嘔，不過做人要有責任感，兩公婆唯有日日煲碟囉。其二：過年出門簡直係同自己過唔去，尤其是上大陸，點會有o野好玩o架？
講完一大餐，花姐居然話我好似韓劇o的聽話媳婦咁，真係俾佢激死!

大阪5天

趁住老公去大阪開會，我都跟住去o左5日，因為會只開一日，其餘時間都係行行逛逛，飲飲食食，所以好多成員都帶埋家眷當旅遊，個團搞到有過百人，幾墟撼呀。
因為坐下午機，入到酒店已經夜晚九點幾，馬上同埋老公幾個熟o的o既行家出外搵食，居酒屋當然係首選。發覺大阪o的物價果然比東京平，一條鹽燒鰈魚同樣七百幾円，但size就大好多!
第二日由大會安排去和歌山Marina City 遊覽兼食海鮮燒烤。呢度係一個面積相當大o既人工半島，設有歐陸式渡假酒店，遊樂場，高爾夫球場，溫泉，釣魚場，海鮮市場同一間燒烤餐廳，可以o係度消磨一日，幾好玩o架。回程順路去o左一個outlet，不過無o野o岩買。大會o既歡迎晚餐係牛肉shabu shabu，每人有8件霜降，加埋菜&炸雞，結果飽到上心口。
第三日佢o地要開會，我就自己顧自己。經過舊年去北海道，見識過同團o個班八太之後，真係對佢o地見而畏之。所以有人問我會唔會一齊行街時，我話要去探朋友，走為上著喇。其實原定要去京都，但知道仲未有紅葉就唔去囉，神戶又唔想去，o係心齋橋都有排行o者。哈哈，見到kitty居然同anna sui crossover，出o左幾樣精品，買..買..買..! 晚飯安排o係一間有園林美景o既餐館食日式自助餐，可惜去到已經天黑晒，靚靚花園都變o左非洲森林! 全晚o既主菜，係一隻足足三尺長o既壽司船上面o個兩條巨型鯛魚同埋兩隻超級龍蝦刺身。不過，睇相得喇。由於有o個幾個好自私o既八太在場，我o地排到時只係剩番魚頭魚尾&蝦殼o咋!所以之後，我o地幾個人又要搵消夜，一於拼死去食河豚(雞泡魚)。道頓崛後街有好多河豚專門店，揀o左間落地牢o既。叫o左七人份量套餐，因為要按人頭計，每位五千五円。包括有河豚皮前菜，刺身，炸骨，魚肉火鍋，最後用湯底煮粥。o的魚肉拎出o黎時，仲o係度震震o下，睇見有o的恐怖，不過真係好美味啊!
第四日全日自由，我o地幾個小圈子又只係想購物食o野。早上行o下酒店前面大路，發覺沿路種滿銀杏(白果)樹，結晒果喇，第一次見!十一點幾，o的男士要飲咖啡食件餅，栗子latte tea+栗子蛋糕，好味道! 食完再行大丸，sogo。哈，十二點零又話食飯，好似唔想我o地買o野咁!好，食蛋包飯啦，香港真係食唔到o架。下午繼續購物，o係black lable遇到另一團友，話sogo地牢有間麵店有魚翅拉麵，1260円一碗，塊翅有菠蘿咁大片喎。班友聽見即刻起晒哄話要去搵搵，o的飯仲未落格呀!但又確係幾好味喎，個個食清光!(真係同廖太喪食團有得比)五點幾捧住個肚返酒店，諗住等夜o的先去食晚飯，因為我名古屋一對朋友夫婦出o黎見我，話要九點幾先到。誰知七點零已經到o左，原來佢超速開快車，一路有驚無險。佢o黎到就嗌肚餓，咁唯有call齊小圈子一行8人出動，目標係蟹道樂~食蟹! 叫o左兩個蟹鍋+湯底煮粥，蟹腳刺身，蟹肉太卷，炸蟹球，夠晒喇!! 我o地間房對面係一家五層高o既唱片店，正掛住幅巨型o既kat-tun廣告，阿四見到一定食得好開心。由於我o地要搭早機，同我朋友只係食到餐飯咁少時間，要佢o地迢長遠路出o黎，真係唔好意思。
去日本咁多次，都未試過坐朝早十點機，一點幾就返到香港，下次都唔好搞我喇!
有興趣睇相的話，請去：http://xina925.spaces.live.com/