HAPPY NEW YEAR

祝大家新年進步，萬事勝意，身體健康，年年一齊去旅行 !!

上野大牌檔

接o左柯打要幫人去上野買咖啡粉，又經過"二木" 街口個專食魚生"丼"[即有料o係飯上面o既大碗飯]o既檔口。記得數年前同姨甥女試過，天婦羅丼隻蝦足足五六吋長，只不過賣500円!如今轉o左賣魚生丼，可能費事開爐炸o野啦，不過仍然其門如市。好，我地三個又食。檔口擺有幾張長檯，可以坐滿三，四十人，大牌檔風味當然係逼逼地啦。檔前掛起大塊menu有圖有字，睇o岩邊樣就埋收銀度講低俾錢，拎住張單搵位坐，一陣間就
飯到。由於等食o既人太多，食完就要識趣o的起身，有茶水供應都唔會慢慢嘆喇。
估唔到咁多年來，價錢都無乜變動，三文+金槍魚丼500円，我o既帶子+金槍魚丼600円，全店最貴o既海膽+海鮮丼都係1000円o者，所以成日都有條龍排緊。呢度當然唔會期望係高級貨，不過都係新鮮嘛。o係香港已經好少幫趁大牌檔，反而去外地仲有機會喎。

草津以外

草津溫泉今次已是第4次，影的相跟gloria 的也大同小異，所以我會放我地分頭行事那天的。
JANIS & JAZZ 未去過佐野OUTLET，所以搵我帶路。新宿南口坐直通巴士，個半鐘就到，比起富士山腳的御殿場那個，算是很方便，因此亦見到不少同聲同氣的在左右。面積唔細的佐野，有百多二百間大小日本及外國名牌OUTLET SHOP，還有飲食店，環境相當舒適整潔，難怪當地人亦視之為一家大細的假日休閒活動點。
新發現是Agnes b.隔鄰開了家cold stone雪糕店，原來是你點了自己配搭口味(例如綠茶雪糕+合桃+雪芳蛋糕)的雪糕後，店員就會把所有材料放上冰凍的石塊上，像炒菜一樣炒成一堆(似鐵板燒)，再放進脆卜卜的蛋蛋薄脆杯內，完成!最特別的是，炒雪糕的店員一邊炒一邊唱聖誕歌，滿面笑容，真係客人睇見都開心。如此敬業樂業的表現，值得參考參考!

電腦復活了

開開心心從日本回來，一進家門便來個大驚嚇。有人在我個mon上貼了字條，說是一不小心整死了，開不到機!
翌日急詔jazz來看看，發覺竟是HARD DISC 壞了。換過新的之外還要把舊的所有內容過入另一hard disc，希望可以拯救裡面的檔案。誰料這個hard disc 卻總是打不開，最後要拿去給電腦店的"專家"解決。花了一千大元和五天時間，終於在大除夕才"搞掂"! 拿回來後，全部軟件還要重頭再裝一次，至昨晚才總算完成，好..麻..煩 !
阿禮，一餐鮑參翅肚晚飯都不足補數的啊 !