五日4夜北京回來，好累!
我地一行7人，包架七人van自由行，所以行程比較輕鬆。不過司機話一定要早o的出發，以免越晏越多人。但早極我地都要9點，因為大家都..鬥慢!
中國俾我o既印象係..得個大字，千祈咪信張地圖呀! 故宮博物院，真係好有氣勢! 大成咁，以前o的皇帝究竟有無巡過晒所有地方？我地由中午行到4點半關門都未睇晒全部宮殿，甚至想去望o下斬首行刑o既午門都唔夠時間，十分可惜，唔通又要去多次 ？
萬里長城，我地只去八達嶺一段，先坐吊車上，再行山上的城樓。一路的梯級很高，又斜，行得相當辛苦，但又無乜可能唔行o架嘛。要做好漢一o的都唔易，諗o下以前建造長城o既人真係勞苦功高!
鳥巢，只覺個廣場面積好大。水立方，日間睇無乜特別，我諗夜晚有燈會幾靚。要收入場費，所以只o係外拍照算喇。
有熟路人帶住，食到從未食過咁香脆o既北京烤鴨。店名叫"CLUB 1949", 係由一套四合院改裝得非常現代化O既COMPLEX，裡面有畫廊，露天BAR，有咖啡廳和晚飯廳。皮脆但不膩o既烤鴨之外o既其他小菜也很合口味，尤其是用鴨骨淆足七小時o既燉鴨湯。主廚原來係香港某大酒店o既前大廚，跟朋友個女好熟，佢特別介紹甜品杏仁茶湯丸，又係極品。湯元皮又軟又滑，北京麵粉靚o的咩？
另一餐食素，店舖又係由舊屋改裝，店名非常清雅叫"淨心蓮"。不過我嫌佢地點o的香薰太過濃烈，裝修又太做作，連本menu都用硬皮，成幾斤重!食物就十分滿意，諗唔到素菜都可以做到真o既一樣咁味，例如黑椒漢堡扒，水煮魚。奇就奇在，佢地強調唔用薑，荵，蒜等葷料，但卻用辣椒，黑椒!
有一個叫"798藝術區"o既地方，俾一o的中國o既新進藝術家展出作品，有室內亦有露天，同時也有小食肆和咖啡室。我地o係呢度都消磨o左一個上午
很幸運，我地o係北京幾日天氣都非常好，藍藍天空無一點雲，十六，七度氣溫，正是秋高氣爽。所以來自各地o既遊客特多，四處景點都人頭踴踴，想影一張四四正正o既天壇或故宮照片，簡直無可能!
有點失望，就係這等歷史重寶，理應是殘殘舊舊，保留著歲月o既痕跡才對嘛，但為了奧運招呼外來遊客，竟然被番新得大紅大金，連o的胡同都變晒新屋咁....唉!
還有其他相片，有興趣請看：//xina925.spaces.live.com
